Сябра Кансэрватыўна-хрысьціянскай партыі БНФ Ян Дзяржаўцаў накіраваў у адміністрацыю Кастрычніцкага раёну Віцебску заяўку на правядзеньне пікету 26 красавіка. Пікет прымеркаваны да 27-й гадавіны аварыі на Чарнобыльскай АЭС. Нагадаем, гэта не адзінае мерапрыемства, заплянаванае на 26 красавіка апазыцыйнымі палітыкамі ў Віцебску: раней заяўку на правядзеньне мітынгу падаваў абласны старшыня партыі БНФ Леанід Аўтухоў.

Навучаньне арганізаванае намаганьнямі актывістаў руху “За свабоду” на базе мясцовага Эўраклюбу. Дзейнасьць школы ў Віцебску каардынуе Юры Нагорны. Першыя заняткі правеў палітоляг Юры Чавусаў. Да працы ў школе будуць запрашацца экспэрты ў галіне мясцовага самакіраваньня, рыначнай эканомікі, правазнаўства, працы СМІ, грамадзянскай супольнасьці, рэформаў ЖКГ, адукацыі, аховы здароўя, сацыяльнай абароны.

Павал Севярынец, які адбывае за Плошчу тры гады «хіміі» ў Пружанскім раёне, паведаміў пра свае назіраньні за пасяўной, якая пачалася на Берасьцейшчыне. Палітвязень кажа пра аўральнасьць гэтай кампаніі й называе тых, хто, як ён мяркуе, сваёй актыўнасьцю насамрэч перашкаджае працаўнікам сельcкай гаспадаркі.

Суд над віцебчуком Пятром Івановым, затрыманым раніцай 12 красавіка ў будынку абласнога ДАІ, распачаўся ў гэты самы дзень пад канец працоўнага дня. Спадар Іваноў заявіў хадайніцтва аб удзеле ў судовым працэсе адваката. Судзьдзя суду Першамайскага раёну Віцебску Андрэй Прэйс хадайніцтва задаволіў. Пятру Іванову дадзены час да 11:00 17 красавіка, каб заключыць дамову з адвакатам. Да гэтага часу ён адпушчаны дадому.

Віцебскія актывісты атрымалі ліст ад “хуткай дапамогі”, якая адмовілася ад дзяжурства на пікеце 12 красавіка. Прычына адмовы – занятасьць мэдыкаў на спаборніцтве па боксе. Мінулым разам лекары цэнтральнай паліклінікі спасылаліся на “ўспышку сэзонных захворваньняў” у Дзень Волі і ня сталі заключаць дамову з актывістамі на гэтай падставе. А без дамоваў пікеты не дазваляюць.

Чалавек, Культура, Горад. Што паміж імі — кропкі ці коскі? Якім бачаць разьвіцьцё Віцебску яго жыхары і якія праекты ў галіне культуры ім цікавыя найперш? Менавіта гэта абмеркавалі падчас “Кірмашу праектаў”, зладжанага грамадзкай культурніцкай кампаніяй “Будзьма беларусамі!”. Віцебская імпрэза зрабілася заканамерным працягам “Кірмашоў”, што прайшлі ў Гомелі і Магілёве, і грамадзкай дыскусіі і прэзэнтацыі фэстывалю беларускамоўнай рэклямы “Аднак” у горадзе над Дзьвіной.

Міжнародны дзень вызваленьня вязьняў фашысцкіх канцлягераў усталяваны з ініцыятывы ЮНЭСКО ў памяць аб інтэрнацыянальным паўстаньні, якое 11 красавіка 1945 году паднялі вязьні Бухенвальду. Адна з самых трагічных старонак Другой сусьветнай вайны - непаўнагадовыя вязьні. Дзеці станавіліся закладнікамі, донарамі, біялягічнай сыравінай для злачынных экспэрымэнтаў… «Калі 20 гадоў таму была створаная абласная арганізацыя Беларускай грамадзкай асацыяцыі былых непаўналетніх вязьняў фашызму, на ўліку ў райвыканкамах іх было 25 тысяч, на пачатак 2013 году засталося 7400», - паведаміў нязьменны старшыня арганізацыі Хведар Ціханаў.

Праваабаронца Леанід Сьвецік зьвяртаўся ў Цэнтральную выбарчую камісію з прапановай аб унясеньні зьменаў у выбарчы кодэкс. У прыватнасьці, ён прасіў дадаць у артыкул 11 выбарчага кодэксу азначэньне дзяржаўна-прававога статусу выбарчых камісіяў – у дзеючай цяпер рэдакцыі кодэксу такога азначэньня няма. Надоечы быў атрыманы адказ на прапанову: Лідзія Ярмошына паведаміла праваабаронцу, што ягоны зварот пакінуты без разгляду па сутнасьці.

Мэмарыяльныя знакі ў памяць аб подзьвігу воінаў-інтэрнацыяналістаў 2013 году ўсталююць у трох райцэнтрах Віцебскай вобласьці - Бешанковічах, Дуброўне і Сянно. Пра гэта паведаміў журналістам старшыня Віцебскага абласнога савету грамадзкага аб’яднаньня “Беларускі саюз вэтэранаў вайны ў Афганістане” Валер Мацкевіч. 10 красавіка ў Віцебску адбылося ўрачыстае мерапрыемства, прысьвечанае 20-годзьдзю вэтэранскай арганізацыі.

Старшыня віцебскай абласной арганізацыі партыі БНФ Леанід Аўтухоў накіраваў у адміністрацыю Чыгуначнага раёну Віцебску заяўку на правядзеньне 26 красавіка мітынгу. Мітынг будзе прымеркаваны да 27-й гадавіны катастрофы на Чарнобыльскай АЭС, у выніку якой пацярпелі мільёны беларусаў. Меркаванае масавае мерапрыемства таксама мусіць стацца акцыяй пратэсту супраць будаўніцтва ядзерных аб’ектаў на тэрыторыі Беларусі.