15 верасня ў Віцебскім абласным судзе прайшлі тры грамадзянскія працэсы, на якіх разглядаліся пазовы па ліквідацыі грамадскіх аб'яднанняў. За некалькі гадзін тры суддзі ліквідавалі тры недзяржаўныя арганізацыі (НДА) экалагічнай і турыстычнай скіраванасці. Пазоў у суд аб іх закрыцці падавала галоўнае ўпраўленне юстыцыі Віцебскага абласнога выканаўчага камітэту.

27 жніўня адміністрацыя Чыгуначнага раёну Віцебску прыняла рашэнне аб ліквідацыі сацыяльна-культурнай установы «Віцебск для мяне» (Vitebsk4me). Прычынай, на падставе якой улады закрываюць гэтую грамадскую структуру, стала «неажыццяўленне прадпрымальніцкай дзейнасці цягам 24 месяцаў запар».

8 верасня Віцебскі абласны суд задаволіў пазоў галоўнага ўпраўлення юстыцыі віцебскага абласнога выканаўчага камітэту да аршанскага моладзевага абʼяднання «Звяз». Сваёй пастановай суддзя Марына Острыкава прыняла рашэнне ліквідаваць арганізацыю. Прадстаўнік «Звязу» у суд не зʼявіўся. Кіраўнік «Звязу» – вядомы аршанскі актывіст Ігар Казмерчак.

Праваабаронца Павел Левінаў звярнуўся да старшыні Віцебскага абласнога выканаўчага камітэту Мікалая Шарстнёва з прапановай аднавіць дыялог кіраўніцтва вобласці з прадстаўнікамі грамадзянскай супольнасці. Першая дыялогавая сустрэча адбылася 17 жніўня 2020 году ў будынку Віцебскага аблвыканкаму і доўжылася больш за пяць гадзін. Але ад паўторнай сустрэчы ў колішнім фармаце ўлады катэгарычна адмовіліся.

Ад 14 ліпеня 2021 году ўлады распачалі ліквідацыю культурна-асветніцкай установы «Цэнтр урбаністычных праектаў і ініцыятыў «Прастора». Гэтае грамадскае аб'яднанне было зарэгістраванае ў якасці юрыдычнай асобы ў студзені 2016 году ў Віцебскім раёне. Называецца і прычына закрыцця ўстановы: «Неажыццяўленне камерцыйнай арганізацыяй прадпрымальніцкай дзейнасці на працягу дваццаці чатырох месяцаў запар».