Паводле афіцыйных звестак, узровень зарэгістраванага беспрацоўя ў Віцебскай вобласці на 1 жніўня 2021 году склаў 0,3% і ў параўнанні з 1 жніўня 2020 году не змяніўся. Зніжэнне ўзроўню зарэгістраванага беспрацоўя адзначаецца ў 10 раёнах, а таксама ў Віцебску і Наваполацку.

Некалькі віцебскіх тэлеграм-каналаў паведамілі пра тое, што на гарадзенскага музыку і грамадзянскага актывіста Ігара Банцэра, які адбывае крымінальнае пакаранне ў віцебскай папраўчай установе адкрытага тыпу №9, адміністрацыяй установы складзены другі пратакол аб парушэнні рэжыму знаходжання.

У апошнія тыдні віцебскімі судамі былі вынесеныя абвінаваўчыя прысуды ў дачыненні да ўдзельнікаў пратэставых падзей 2020 і 2021 гадоў. Два з паловай гады калоніі прысудзілі дзісненцу Аляксею Каршуну (ч.1 арт. 130 КК).

Ад 14 ліпеня 2021 году ўлады распачалі ліквідацыю культурна-асветніцкай установы «Цэнтр урбаністычных праектаў і ініцыятыў «Прастора». Гэтае грамадскае аб'яднанне было зарэгістраванае ў якасці юрыдычнай асобы ў студзені 2016 году ў Віцебскім раёне. Называецца і прычына закрыцця ўстановы: «Неажыццяўленне камерцыйнай арганізацыяй прадпрымальніцкай дзейнасці на працягу дваццаці чатырох месяцаў запар».

Ужо месяц, як экс-лідара прэзідэнцкай гонкі Віктара Бабарыку адправілі ў папраўчую калонію №1 у Наваполацк. Там ён пачаў адбываць свой 14-гадовы тэрмін. Апроч Бабарыкі ў калоніі №1 цяпер адбываюць пакаранне 24 палітвязні, сярод якіх былы вайсковец Дзяніс Урад і блогер Аляксандр Кабанаў.

Палітзняволеная Юлія Кашаверава, асуджаная на паўтара года калоніі паводле ч.1 арт. 339 КК (Хуліганства), накіравала ў так званы "Круглы стол дэмакратычных сіл" (КСДС), які ўзначальвае Юрый Васкрасенскі, прашэнне аб памілаванні. Пра гэта паведаміў яе бацька.

Петыцыя пад назвай «Просім закрыць заапарк у горадзе Віцебск!» з'явілася на платформе petition.by 4 ліпеня 2021 году. За два тыдні пад ёй падпісаліся 270 чалавек. Зварот быў накіраваны ў Віцебскі гарвыканкам і Віцебскі абласны камітэт прыродных рэсурсаў і аховы навакольнага асяроддзя. 23 ліпеня прыйшоў афіцыйны адказ, які падпісаў намеснік старшыні гарвыканкаму Віктар Глушын.

"Хатняя хімія", "хімія", пазбаўленне волі... За апошнія месяцы беларускія суды выносяць мноства прысудаў па палітычных крымінальных справах. Судзяць за актыўны ўдзел у мірных акцыях пратэсту, нібыта гвалт у дачыненні да супрацоўнікаў міліцыі і службоўцаў унутраных войскаў, масавыя беспарадкі, абразу прэзідэнта і службовых асобаў. Для многіх з тых, хто апынуўся на лаве падсудных, і іх сваякоў – гэта першы такі вопыт.

5 жніўня прэс-сакратар МУС РБ Вольга Чамаданава паведаміла, што пастановай суду Чыгуначнага раёну Віцебску інфармацыйны рэсурс «Чорная кніга артыстаў Беларусі / Белая кніга артыстаў Беларусі» прызнаны экстрэмісцкім. Падставай для такога рашэння сталі матэрыялы праверкі ўпраўлення ГУБОПіК МУС па Віцебскай вобласці.

У цяперашні час мясцовыя ўлады прыступілі да ліквідацыі сацыяльна-асветніцкай ўстановы ў галіне гісторыка-культурнай спадчыны "УНОВІС-ФОРУМ", якая была зарэгістраваная рашэннем адміністрацыі Першамайскага раёну Віцебску ў сярэдзіне 2019 года. Прычынай ліквідацыі, на думку чыноўнікаў, стала "неажыццяўленне камерцыйнай арганізацыяй прадпрымальніцкай дзейнасці на працягу дваццаці чатырох месяцаў запар".