У лістападзе 2021 году суд Дубровенскага раёну вынес прысуд паводле арт. 369 КК («Знявага прадстаўніка ўлады») у дачыненні 40-гадовага спартоўцы Юрыя Свіціна. Па версіі следства, ён абразіў пракурора Дубровенскага раёну Міхаіла Пацеева. Суддзя Марыя Цыклінская прызначыла пакаранне ў выглядзе трох гадоў абмежавання волі без накіравання ва ўстанову адкрытага тыпу і штраф 2900 рублёў. Прысуд набыў ужо законную моц.

Светлавы кораб з гербом Віцебскай вобласці 14 студзеня вярнулі на будынак у цэнтры гораду (вул. Гогаля, 14). Пагоня знікла з будынку 4 студзеня. Пазней у Віцебскім гарвыканкаме паведамілі журналістам, што знікненне Пагоні не мае ніякага палітычнага падтэксту, і паабяцалі вярнуць – ужо адрэстаўраваны. Паглядзіце, як яго змянілі, прапануюць «Народныя навіны Віцебска».

Самымі выніковымі «знішчальнікамі ТГ» былі раённыя суды Віцебску. Ім удалося «знішчыць» 74 «электронных экстрэмістаў». На рахунку астатніх раённых судоў вобласці толькі 16 «перамог». Больш за ўсіх шчыраваў суд Чыгуначнага раёну Віцебску.

Праваабаронцы просяць падтрымаць палітвязня Андрэя Новікава і ягоную сям’ю. У сям’і Андрэя маленькая дачка з інваліднасцю, і ёй перыядычна трэба праходзіць працэдуры. Цяпер яна ляжыць у шпіталі. Але праз тое, што больніца знаходзіцца ў іншай вобласці, жонка палітвязня Вольга вымушаная аплачваць лячэнне дачкі.

12 студзеня 2022 года Віцебскі абласны суд па звароце Упраўлення юстыцыі Віцебскага аблвыканкаму ліквідаваў 5 раней зарэгістраваных грамадскіх аб'яднанняў. Гэта страта для грамадзянскай супольнасці вобласці і краіны. Пад ліквідацыю трапілі спартовы клуб «Віцьбіч», «Таварыства дружбы» Полацк-Фрыдыхсхафен«, Віцебскі дзіцячы хоспіс, «Таварыства пчаляроў-аматараў» і аб’яднане «Шлях з варагаў у грэкі».

11 студзеня на свабоду выйшаў палітвязень з Наваполацку Ілля Лабацэвіч. Ён цалкам адбыў тэрмін зняволення – паўтара года – і быў вызвалены са шклоўскай калоніі №17. Іллю Лабацэвіча прызналі вінаватым у гвалце ў дачыненні супрацоўніка ўнутраных спраў (арт. 364 КК) і асудзілі на паўтара года калоніі толькі за тое, што падчас мірнага шэсця ў Наваполацку ён бараніў сваю маці.

Мяркуючы па актыўнасці прадстаўнікоў "уладнай вертыкалі" і дзяржаўных СМІ Віцебскай вобласці, намечаны на канец лютага рэферэндум па зменах у Канстытуцыю ўсё ж адбудзецца. Вынік рэферэндуму будзе залежыць ад даверу грамадзян да інстытуту галасавання і якасці агітацыі і прапаганды.

12 студзеня 2022 году на сваёй старонцы ў Facebook юрыст ліквідаванага «Офісу па правах людзей з інваліднасцю» Алег Граблеўскі паведаміў, што паспяхова пакінуў Беларусь і зараз знаходзіцца па-за дасяжнасцю следчых органаў краіны. Дзяржава выставіла супраць яго абвінавачанне паводле артыкулу 209 («Махлярства») за нібыта завалоданне грашыма арганізацыі.

На рэсурсе «Зручны горад» з'явілася петыцыя з патрабаваннем прыцягнуць службовых асобаў Віцебскага аблвыканкаму да адміністрацыйнай адказнасці за распаўсюд экстрэмісцкіх матэрыялаў, якія змяшчаюцца на афіцыйным сайце ведамства. Аўтары петыцыі налічылі на сайце 71 згадванне рэсурсаў, якія ўключаныя ў рэспубліканскі спіс экстрэмісцкіх матэрыялаў.

Палітзняволены, былы кантрактнік са 103-й віцебскай паветрана-дэсантнай брыгады, Раман Марусаў этапаваны ў калонію «Віцьба»-3. Яго асудзілі да шасці гадоў калоніі паводле арт. 130 КК («Распальванне сацыяльнай варожасці») за нібыта перадачу інфармацыі BYPOL. Хлопцу зараз вельмі патрэбная маральная і матэрыяльная дапамога.