Паводле зьвестак Белстату пра заробкі ў рэгіёнах, у жніўні ў краіне засталося толькі тры раёны, дзе работнікам плацяць у сярэднім менш за 500 дэнамінаваных рублёў на месяц. Два з гэтых трох раёнаў знаходзяцца ў Віцебскай вобласьці.

Паводле інфармацыі грамадзкага актывіста Ігара Пастнова, на выязным паседжаньні суду Кастрычніцкага раёну Магілёва Сяргей Рыжоў быў асуджаны на тры гады турмы. Да гэтага вязень адбываў пакараньне ў папраўчай калёніі строгага рэжыму.

Вядомы віцебскі краязнаўца Мікалай Півавар пачаў збор сродкаў на выданьне даведніка “50 музэяў Віцебску”. Кошт кнігі складае 8 рублёў, а дапамагчы выданьню можа кожны ахвотны праз краўдфандынгавы сайт “Улей”.

«Наша Ніва» паведамляла пра спробы вывозіць беларускіх дзяцей у ваенізаваныя лягеры ў Расеі, дзе іх школілі ў тым ліку баевікі «ДНР». Дачыненьне да гэтага мелі псэўдаказацкія структуры. Другая публікацыя «Нашай Нівы» на тую ж тэму датавалася 16 верасьня, калі выявіўся новы кіраўнік «беларускай дэлегацыі» на чарговых дзіцячых зборах пад кіраўніцтвам баевікоў Данбасу. Гэта быў расейскі казак Аляксандар Шаўчэнка.

Палітвязень Міхаіл Жамчужны, які адбывае пакараньне ў папраўчай калёніі №14 ў Навасадах, атрымаў адказ на наглядную скаргу, якую на пачатку жніўня накіраваў у Вярхоўны суд.

Ліквідацыя 25 адсоткаў дрэваў у віцебскім парку Партызанскай славы і будаўніцтва на іх месцы праваслаўнай царквы – копіі полацкага Сафійскага сабору 11 стагодзьдзя вымусілі жыхароў вуліц Урыцкага і Чэхава пачаць збор подпісаў пад зваротам да прэзыдэнта ў абарону парку.

Свабоднаму прафсаюзу заводу «Шкловалакно» полацкі райвыканкам забараніў правядзеньне пікету 7 кастрычніка ў Міжнародны дзень барацьбы за годную працу. Дэмакратычныя прафсаюзы Беларусі ў гэты дзень традыцыйна арганізуюць розныя мерапрыемствы з патрабаваньнем годных умоваў працы, павышэньня заробку і гарантаваных працоўных месцаў.

Дарогу, якая вядзе ў вёску Горкі Бешанковіцкага раёну, вяскоўцы прасілі адрамантаваць яшчэ ўвесну. Будаўнікі зьявіліся тут летам. У выніку паводле папер дарога прыдатная да выкарыстаньня, але мясцовыя жыхары сьцьвярджаюць, што зробленая толькі палова працы.

Абвешчаны 26 верасьня збор подпісаў супраць зьнішчэньня парку на месцы будаўніцтва нечакана перайшоў у публічную дыскусію. Яна разгарэлася са зьяўленьнем настаяцеля будучага сабору протаіерэя Міхаіла, які вырашыў пажартаваць з крытычна настроенымі месьцічамі.

Незалежныя прафсаюзы плянуюць правесьці 7 кастрычніка ў розных гарадох Беларусі шэраг акцыяў, прысьвечаных Міжнароднаму дню барацьбы за годную працу. Аднак акцыі пройдуць ня ўсюды. У Новалукомлі рабочыя мясцовай ДРЭС, якія належаць да свабоднага прафсаюзу, вырашылі ня ладзіць публічных мерапрыемстваў у горадзе, а зьбіраюцца далучыцца да мітынгу ў Менску, калі акцыю прафсаюзаў дазволяць сталічныя ўлады.