16 жніўня ў судзе Першамайскага раёну Віцебску працягнуліся судовыя слуханні ў справе віцябляніна Сяргея Думавы. Як і мінулым разам, на паседжанне прыйшлі знаёмыя падсуднага і неабыякавыя віцябляне. Аднак па хадайніцтве пракуратуры суд прыняў рашэнне выдаліць з залы ўсіх прысутных. Суддзя Міхаіл Юрчанка дазволіў застацца толькі жонцы падсуднага.

Агулам за першае паўгоддзе 2021 году на Віцебшчыне было разгледжана шэсць дзясяткаў крымінальных спраў за публічныя абразы ў Інтэрнэце прадстаўнікоў ўлады, за паклёп, пагрозу ўжывання гвалту ў дачыненні да супрацоўнікаў міліцыі. На разглядзе ў судах знаходзяцца яшчэ 9 аналагічных спраў.

Палітычныя зняволеныя Ян Дайліда і Уладзімір Седзянеўскі, якія адбываюць пакаранне ў папраўчай установе адкрытага тыпу №9 у Віцебску, звярнуліся да кіраўніка так званай інфармацыйна-аналітычнай установы «круглы стол дэмакратычных сіл» Юрыя Васкрасенскага з просьбай садзейнічаць у іх памілаванні. Відаць, яны вырашылі, што такі спосаб выйсці на свабоду найбольш просты і хуткі ў параўнанні з амністыяй.

13 жніўня ў судзе Першамайскага раёну Віцебску пачаўся судовы працэс над 35-гадовым віцяблянінам Сяргеем Думавам. Супраць яго выставілі абвінавачанні ў трох артыкулах Крымінальнага кодэксу. Паводле ч. 1 арт. 293 («Арганізацыя масавых беспарадкаў) Думаве пагражае да 15 гадоў пазбаўлення волі. Яго таксама вінавацяць у падрыхтоўцы да злачынства (ч. 1 арт. 13 КК), у навучанні для ўдзелу ў масавых беспарадках (ч.3 арт. 293 КК), у апаганьванні збудаванняў і псаванні маёмасці ( арт. 341 КК).

Віцяблянін Юры Серабро быў прызнаны вінаватым у публічнай абразе прэзідэнта Рэспублікі Беларусь (ч. 1 арт. 368 КК РБ). За невялікі каментар у «Інстаграм», у якім мужчына параўнаў Лукашэнку з Люцыферам, суддзя Сняжана Кіндзеева асудзіла яго на 1 год і 6 месяцаў калоніі. Серабро ўзялі пад варту проста ў зале суду. Увесь працэс, не лічачы перапынку, доўжыўся ўсяго 40 хвілін.

Калонія, турма — гэта тое месца, дзе не кожны, хто там сядзіць, — вінаваты. Людзі часта сутыкаюцца з неапраўданай жорсткасцю пакарання. Таму падтрымка з волі ім вельмі патрэбная, яны павінны ведаць, што іх чакаюць на волі. Але перад людзьмі часта ўзнікаюць пытанні: "А як пісаць, а пра што пісаць?"

У судзе Кастрычніцкага раёну Віцебску 13 жніўня пачалі разглядаць крымінальную справу паводле ч.1 арт. 368 («Публічная абраза прэзідэнта РБ»). 41-гадовага Юрыя Серабро абвінавачваюць у тым, што 1 сакавіка ў «Інстаграм» ён размясціў абразлівы каментар на адрас Аляксандра Лукашэнкі. Пракурор папрасіў 2 гады калоніі. Рашэнне мусіць прыняць суддзя Сняжана Кіндзеева. Сам абвінавачаны адмовіўся ад адваката і прызнаў віну ў поўным аб'ёме.

12 жніўня суд Першамайскага раёну Віцебску вынес судовае рашэнне ў справе беспрацоўнага віцябляніна Аляксандра Ш., абвінавачанага паводле арт. 364 КК («Гвалт альбо пагроза ўжывання гвалту ў дачыненні да супрацоўнікаў органаў унутраных спраў альбо з помсты за выкананне службовай дзейнасці»). Суддзя Міхаіл Юрчанка задаволіў просьбу пракуратуры і асудзіў абвінавачанага на паўтара года пазбаўлення волі з адбыццём пакарання ў папраўчай калоніі ва ўмовах агульнага рэжыму.

Паводле афіцыйных звестак, узровень зарэгістраванага беспрацоўя ў Віцебскай вобласці на 1 жніўня 2021 году склаў 0,3% і ў параўнанні з 1 жніўня 2020 году не змяніўся. Зніжэнне ўзроўню зарэгістраванага беспрацоўя адзначаецца ў 10 раёнах, а таксама ў Віцебску і Наваполацку.

Некалькі віцебскіх тэлеграм-каналаў паведамілі пра тое, што на гарадзенскага музыку і грамадзянскага актывіста Ігара Банцэра, які адбывае крымінальнае пакаранне ў віцебскай папраўчай установе адкрытага тыпу №9, адміністрацыяй установы складзены другі пратакол аб парушэнні рэжыму знаходжання.