Былую настаўніцу з Мёраў Эму Сцепулёнак, якую абвінавацілі ў распальванні сацыяльнай варожасці (арт. 130 КК) і абразе прадстаўніка ўлады (арт. 369 КК), перавялі з Жодзінскай турмы ў віцебскі СІЗА №2. У апошнім лісце на волю палітзняволеная піша, што «ніякага руху па справе няма наагул». 68-гадовая жанчына знаходзіцца за кратамі больш за тры месяцы.

Без аглядкі на тое, што з 1 студзеня 2022 году пачалі дзейнічаць эканамічныя санкцыі з боку аднаго з асноўных беларускіх гандлёвых і інвестыцыйных партнёраў - краін Еўропы, на пазачарговай сесіі абласнога Савету дэпутатаў зацвердзілі праграму сацыяльна-эканамічнага развіцця Віцебскай вобласці на чарговую пяцігодку. Незалежныя эканамісты сумняюцца, што яна будзе выканана.

Пакуль на Віцебшчыне не назіраецца якой-небудзь актыўнасці ў справе абмеркавання паправак у Асноўны закон краіны. Тэма рэферэндуму не абмяркоўваецца ў публічных месцах і працоўных калектывах. Улады абмежаваліся фармальнымі мерапрыемствамі і выступамі ў прэсе. Грамадзяне рыхтуюцца да байкоту ці да псавання бюлетэняў для галасавання. 

29 снежня суд Бешанковіцкага раёну вынес абвінаваўчы прысуд у крымінальнай справе ў дачыненні 35-гадовага жыхара Віцебску, які нібыта абразіў памочніка пракурора Віцебску. На падставе арт.369 КК мужчыну прызначылі пакаранне ў выглядзе абмежавання волі з накіраваннем у папраўчую ўстанову адкрытага тыпу на тэрмін 1 год 6 месяцаў і штрафу ў 2900 рублёў.

27 снежня праваабарончыя арганізацыі Беларусі заявілі аб прызнанні васьмі чалавек палітвязнямі. Сярод іх - віцяблянін Аляксандр Васін, асуджаны на 1 год і 6 месяцаў абмежавання волі з накіраваннем у папраўчую ўстанову адкрытага тыпу за абразу супрацоўніка міліцыі. Цяпер ён адбывае пакаранне ў папраўчай установе адкрытага тыпу №55, якая знаходзіцца ў Менску. 

29 снежня суд Чыгуначнага раёну Гомля прызнаў экстрэмісцкімі матэрыялы тэлеграм-канала «Вясна / Правы чалавека ў Беларусі». Праваабаронцы сачылі за вялікай колькасцю справаў і працэсаў, іх валанцёры заўсёды былі надзейнай крыніцай інфармацыі. Дык што цяпер – «Вясна» ўсё? Пра гэта піша «Наша ніва».

27 снежня з папраўчай калоніі №3 «Віцьба» выйшаў на свабоду палітвязень Дзяніс Дземух. 22-х гадовы хлопец адбыў у зняволенні 15 месяцаў, паведамляюць праваабаронцы «Вясны». Суд Заводскага раёну Менску прызнаў яго вінаватым ва ўдзеле ў дзеяннях, якія груба парушаюць грамадскі парадак (арт. 342 КК) і прысудзіў Дземуху 1 год і 6 месяцаў пазбаўлення волі ў калоніі агульнага рэжыму.

Жыхарка Сянно падала ў суд Кастрычніцкага раёну Віцебска пазоў на прадпрыемства «Віцебскаблводаканал». Паводле яе заявы, 12 жніўня з кранаў у кватэры жанчыны ішла вада цёмнага колеру з непрыемным пахам. Жанчына была пазбаўленая права на атрыманне якаснай пітной вады, марнавала час на выклік адмыслоўцаў для адбору проб вады і на званкі дыспетчарам, пішуць «Народныя навіны Віцебска».

24 снежня каля «сіняга дому» ў Віцебску ў чарговы раз быў затрыманы апазіцыянер Барыс Хамайда. Як перадае Беларускае Радыё Рацыя, Хамайда правёў у міліцэйскім пастарунку тры гадзіны. Пратакол на яго не складалі, але забралі беларускамоўныя кнігі і выданні, якія ён распаўсюджвае ў цэнтры гораду. Хамайда падлічыў, што ў Чыгуначным РАУС Віцебску ляжаць ужо 25 кніжак, адабраных у яго падчас затрыманняў.

У лістападзе 2021 году праваабаронца Наталля Міхалькова накіравала зварот у пракуратуру Віцебскай вобласці з патрабаваннем правесці праверку па факце парушэння кіраўніцтвам і супрацоўнікамі папраўчай калоніі №3 (пас. Віцьба, Віцебская вобласць) правоў Валадара Цурпанава. Аднак пракуратура і ўпраўленне дэпартаменту выканання пакаранняў МУС адмовілася рабіць захады для абароны правоў палітвязня.