Палітвязня Максіма Знака, якога асудзілі на 10 гадоў калоніі, этапавалі для адбыцця пакарання ў папраўчую калонію Віцьба-3, паведамляюць праваабаронцы. У апошніх лістах палітвязень паведамляе, што пакуль знаходзіцца на каранціне. Да гэтага Максім Знак, як мяркуецца, быў змешчаны ў віцебскі СІЗА-2. У верасні 2021 году яго прысудзілі да 10 гадоў калоніі ўзмоцненага рэжыму. 

У апошняй дэкадзе снежня 2021 году рашэннем раённых судоў Віцебскай вобласці 14 медыярэсурсаў былі залічаныя ў рэспубліканскі спіс экстрэмісцкіх матэрыялаў. Пры гэтым суды скарысталіся правам неадкладнага выканання сваіх рашэнняў, паколькі, на думку суддзяў, прамаруджванне ў выкананні рашэння можа прывесці да значнай шкоды для дзяржавы або зрабіць немагчымым самое выкананне.

Праваабарончы цэнтр «Вясна» падрыхтаваў і запусціў у публічную прастору Аналітычны агляд пра стан з правамі чалавека ў Беларусі ў 2021 годзе. Праваабаронцы далі адзнаку парушэнням грамадскіх і палітычных правоў і свабод у краіне, адзначылі негатыўныя тэндэнцыі, якія мелі быць летась. Частка інфармацыі, выкладзенай у дакладзе, тычыцца і Віцебскага рэгіёну.

У Віцебску 4 студзеня з будынку з надпісам «Квітней, родная Віцебшчына» дэмантавалі герб Віцебскай вобласці – Пагоню. Працэс дэмантажу герба зафіксаваў віцебскі фатограф Павел Максімаў, а здымкі размясціў на сваёй старонцы ў Facebook. Як паведамілі журналістам у Віцебскім гарвыканкаме, тое, што з будынку ў цэнтры гораду дэмантавалі герб, не мае ніякага палітычнага падтэксту.

4 студзеня суддзя Аршанскага раёну і гораду Ворша Дзмітрый Разумовіч вынес прысуд Сяргею Парфяненкаву, якога абвінавацілі ў абразе прадстаўніка ўлады (арт. 369 Крымінальнага кодэксу). Мужчыну прызналі вінаватым і пакаралі абмежаваннем волі на два з паловай гады. Аршанец мае намер абскардзіць судовы вырак у Віцебскім абласным судзе.

4 студзеня 2022 году быў апублікаваны ўказ №517 «Аб прызначэнні і вызваленні суддзяў», які Лукашэнка падпісаў у апошні дзень мінулага году. Паводле дакументу, прызначаныя і вызваленыя ад пасады 12 суддзяў Віцебскай вобласці. Праваабаронцы не звязваюць звальненне і новыя прызначэнні ў судовым корпусе з палітычнымі падзеямі 2020-га і 2021 гадоў і бачаць у гэтай ратацыі натуральныя прычыны.

Былую настаўніцу з Мёраў Эму Сцепулёнак, якую абвінавацілі ў распальванні сацыяльнай варожасці (арт. 130 КК) і абразе прадстаўніка ўлады (арт. 369 КК), перавялі з Жодзінскай турмы ў віцебскі СІЗА №2. У апошнім лісце на волю палітзняволеная піша, што «ніякага руху па справе няма наагул». 68-гадовая жанчына знаходзіцца за кратамі больш за тры месяцы.

Без аглядкі на тое, што з 1 студзеня 2022 году пачалі дзейнічаць эканамічныя санкцыі з боку аднаго з асноўных беларускіх гандлёвых і інвестыцыйных партнёраў - краін Еўропы, на пазачарговай сесіі абласнога Савету дэпутатаў зацвердзілі праграму сацыяльна-эканамічнага развіцця Віцебскай вобласці на чарговую пяцігодку. Незалежныя эканамісты сумняюцца, што яна будзе выканана.

Пакуль на Віцебшчыне не назіраецца якой-небудзь актыўнасці ў справе абмеркавання паправак у Асноўны закон краіны. Тэма рэферэндуму не абмяркоўваецца ў публічных месцах і працоўных калектывах. Улады абмежаваліся фармальнымі мерапрыемствамі і выступамі ў прэсе. Грамадзяне рыхтуюцца да байкоту ці да псавання бюлетэняў для галасавання. 

29 снежня суд Бешанковіцкага раёну вынес абвінаваўчы прысуд у крымінальнай справе ў дачыненні 35-гадовага жыхара Віцебску, які нібыта абразіў памочніка пракурора Віцебску. На падставе арт.369 КК мужчыну прызначылі пакаранне ў выглядзе абмежавання волі з накіраваннем у папраўчую ўстанову адкрытага тыпу на тэрмін 1 год 6 месяцаў і штрафу ў 2900 рублёў.