На пачатку кастрычніка, пасьля трохмесячнага маўчаньня, віцебскія праваабаронцы атрымалі ліст ад палітвязьня і свайго калегі Міхаіла Жамчужнага. У лісьце ён выказвае ўсім падзяку за спагаду і падтрымку і просіць працягваць зь ім перапіску. Паведамляе таксама, што праз абставіны, якія ад яго не залежаць, не заўсёды можа адказаць на пасланьні і просіць за гэта прабачэньня.

У віцебскім “Бітлз-клюбе” 5 кастрычніка адбыўся фэст “Рок за жыцьцё”. Імпрэза распачала Тыдзень супраць сьмяротнага пакараньня, які ад 5 да 10 кастрычніка праходзіць у Беларусі. Ідэю ўвядзеньня мараторыя на сьмяротную кару падтрымалі сваімі выступамі і песьнямі ў Віцебску вядомыя беларускія гурты  Teleport, Re1ikt. РСП (“Разьбітае сэрца пацана”) і NIZKIZ.

Згодна з заявай аб правядзеньні пікетаваньня, пададзенай праваабаронцам Леанідам Сьвецікам у адміністрацыю Чыгуначнага раёну Віцебску, імпрэза мусіць адбыцца 12 кастрычніка на пляцоўцы, адмыслова вызначанай гарвыканкамам пад масавыя мерапрыемствы. Асноўная мэта пікету – публічна адзначыць у горадзе Сусьветны дзень супраць сьмяротнай кары.

«Камітэт ізноў заяўляе, што дзяржаве-удзельніку трэба перагледзець сваё заканадаўства,... у прыватнасьці рашэньне № 881 Віцебскага гарадзкога раённага камітэту,... з мэтай спрыяньня поўнаму ажыцьцяўленьню ў дзяржаве-удзельніку правоў, замацаваных у артыкулах 19 і 21 Пакту», – гаворыцца ў надоечы апублікаваных чарговых меркаваньнях Камітэту ААН па правох чалавека (КПЧ), прынятых ім датычна скаргаў праваабаронцы Паўла Левінава.

Праваабаронца Леанід Сьвецік, які лістуецца з палітвязьнем Міхаілам Жамчужным, распавёў, што ад апошняга няма лістоў з чэрвеня. “Відаць, Міхаіл пастаянна знаходзіцца ў ШЫЗА, а таму ня мае магчымасьці пісаць на волю, – кажа суразмоўца. – І гэтая сытуацыя вельмі занепакойвае, бо ня кожны вытрымае такія выпрабаваньні”.