З прычыны штучных стэрэатыпаў наймальнікаў у Беларусі не забясьпечваецца роўнасьць правоў грамадзян у сфэры працы.

У Віцебску 21 лютага прайшоў суд над актывістамі аргкамітэту па стварэньні партыі “Беларуская хрысьціянская дэмакратыя” Аляксеем Кішчуком і Стасам Лаўрэнавым, якіх затрымалі 16 лютага падчас “Хвалі салідарнасьці”. Адвакат знайшоў у матэрыялах справы мноства працэсуальных парушэньняў, дапушчаных супрацоўнікамі міліцыі. У прыватнасьці, міліцыянты для “аб’ектыўнасьці” прыплялі да матэрыялаў справу жанчыну, якая нібыта была сьведкам затрыманьня, паведаміла віцебская каардынатарка БХД Тацьцяна Севярынец, якую за спробу сфатаграфаваць рэчавыя доказы выдалілі з залі суду.

Раскрытая крымінальная справа, заведзеная па факце хуліганскіх дзеяньняў з выкарыстаньнем самаробнага выбуховага прыстасаваньня ля адміністрацыйнага будынку ўпраўленьня КДБ Беларусі па Віцебскай вобласьці 11 лістапада. Пра гэта паведамілі 20 лютага на сумесным брыфінгу начальнік упраўленьня Сьледчага камітэту па Віцебскай вобласьці Ўладзімер Шалухін і начальнік УУС Віцебскага аблвыканкаму Ігар Яўсееў. У зьдзяйсьненьні злачынства абвінавачваецца жанчына, раней судзімая за пашкоджаньне маёмасьці, хуліганства і крадзяжы.

У Віцебску 18 лютага актывісты аргкамітэту па стварэньні партыі “Беларуская хрысьціянская дэмакратыя” ў межах маратону “Хваля салідарнасьці” зладзілі супольную малітву за палітвязьняў. Яна праходзіла каля Эўфрасіньнеўскага крыжа. “Нас было няшмат, але людзей у чорным, якія пільна сачылі за намі і былі гатовыя ў любы момант на нас накінуцца, было ў два разы больш”, - адзначыла каарданатарка БХД па Віцебскай вобласьці Тацьцяна Севярынец.

У 2012 годзе ў Віцебскай вобласьці было зьдзейсьнена 54 забойстваў і замахаў на забойствы. Гэта амаль на 12% адсоткаў больш, чымся год раней. Гэткія дадзеныя прагучалі на каардынацыйнай нарадзе па барацьбе са злачыннасьцю і карупцыяй у Віцебскай вобласьці. Паводле зьвестак Генпракуратуры, таксама ўзрасла на Віцебшчыне колькасьць злачынстваў, зьвязаных з наўмысным прычыненьнем цяжкіх цялесных пашкоджаньняў (са 157 да 182, або на 15,9%). Павелічэньне колькасьці злачынстваў гэтай катэгорыі адбылося ў 12 раёнах вобласьці, найбольш значнае - у Кастрычніцкім, Першамайскім раёнах гораду Віцебску, Віцебскам, Мёрскім і Пастаўскім раёнах, гарадох Наваполацку і Воршы.

Судовае паседжаньне па адміністрацыйнай справе актывістаў аргкамітэту па стварэньні партыі «Беларуская хрысьціянская дэмакратыя» Станіслава Лаўрэнава і Аляксея Кішчука перанесенае на 16:00 21 лютага. Гэткае рашэньне прыняла сёньня судзьдзя Іна Грабоўская пасьля таго, як затрыманыя запатрабавалі адвакатаў. Выходныя актывісты БХД правялі ў ізалятары часовага ўтрыманьня. Ім прад’яўленае абвінавачваньне паводле арт. 23.34 КаАП (парушэньне парадку арганізацыі або правядзеньня масавых мерапрыемстваў).

Галоўны лекар Віцебскага абласнога клінічнага скурна-вэнэралягічнага дыспансэру Віктар Сьпірыдонаў выказаўся супраць высокіх коштаў на прэзерватывы. "Маніторынг коштаў, праведзены нашымі спэцыялістамі падчас рэйдавых прафіляктычных мерапрыемстваў, паказаў, што многія гандлёвыя прадпрыемствы ставяць на прэзэрватывы высокія гандлёвыя надбаўкі, абмяжоўваючы тым самым даступнасьць гэтых вырабаў для спажыўцоў. Пры гэтым варта ўсьведамляць, што ў першую чаргу да спажыўцоў гэтага тавару належыць моладзь, даходы якой ня вельмі высокія ", - адзначыў Віктар Сьпірыдонаў.

17 лютага ў Віцебску мясцовыя сябры аргкамітэту па стварэньні партыі “Беларуская хрысьціянская дэмакратыя” правялі сумесную акцыю ў межах “Хвалі салідарнасьці”. У гэты дзень яны разам напісалі лісты беларускім палітвязьням, а таксама ўзялі капэрты з адрэсамі вязьняў з сабой, каб як мага больш людзей маглі напісаць ім. “Спадзяемся, што лісты дойдуць да ўсіх зьняволеных”, - адзначыла каардынатарка аргкамітэту БХД па Віцебскай вобласьці Тацьцяна Севярынец.

У Воршы 16 лютага адбыўся сход актыву кампаніі «Гавары праўду» Віцебскай вобласьці. Да больш як 20 актывістаў зь Віцебску, Воршы, Коханава, Полацку, што сабраліся, прыехаў сябра цэнтральнага штабу кампаніі Сяргей Вазьняк. Размова пайшла пра зробленую працу і пляны на будучыню.

У Маскве завяршылася праца 20-й Міжнароднай выставы прадуктаў харчаваньня, напояў і сыравіны для іх вытворчасьці «Прадэкспа-2013». На працягу працоўнага тыдня – з 11 па 15 лютага – сваю прадукцыю дэманстравалі звыш за 2250 кампаніяў з 63 краін свету. Удзел у выставе ўзялі і 70 прадпрыемстваў зь Беларусі, не на апошнім месцы сярод якіх былі вытворцы Віцебшчыны.