З 1 па 8 жніўня суддзя Наваполацкага гарадскога суда Таццяна Хрыпач разбірала справу бубнача гурта «Паранойя долс» Дзмітрыя Шалака. Суд прызнаў яго вінаватым паводле ч. 1 арт.368 КК (Абраза прэзідэнта Рэспублікі Беларусь) і паводле арт.369 КК (Абраза прадстаўніка ўлады). Дзмітрыя асудзілі да трох з паловай гадоў пазбаўлення волі з адбываннем пакарання ў папраўчай калоніі ва ўмовах агульнага рэжыму і да штрафу памерам 200 базавых велічыняў. (8 тысяч рублёў). Сёлета ў лютым мужчына ўжо быў асуджаны па гэтых самых крымінальных артыкулах. 

У газеце «Белорусь сегодня» выйшаў артыкул Андрэя Мукавозчыка «Как выглядит еще одна подрывная сеть, ячейки которой нащупали родители в разных уголках Беларуси». Хто і што «намацаў», у тэксце не канкрэтызуецца. Але аўтар не пашкадаваў абразаў на адрас настаўнікаў, якія нібыта стварылі «падрыўную сетку», бо праводзілі мерапрыемствы з мэтай падвысіць узровень прафесійнага майстэрства.