Затрыманых на фэсце «Аршанская бітва» асудзілі на 10 сутак арышту
Затрыманых на фестывалі «Аршанская бітва» асудзілі на 10 сутак адміністрацыйнага арышту. Як паведамляе тэлеграм-канал «Вясна» назірае», трох чалавек прызналі вінаватымі ва ўдзеле ў «несанкцыянаваным масавым мерапрыемстве». Гэта - Юрась Копцік, Ігар Уласенка і Васіль Мірановіч. Іх затрымалі ў ноч з 4 на 5 верасня.
У Віцебску пачаўся працэс над Алегам Баразной і Аляксандрам Мацеюком. Іх вінавацяць па «наркатычным» арт. 328
У судзе Чыгуначнага раёну Віцебску 7 верасня пачаўся судовы працэс над актывістамі «Краіны для жыцця» Алегам Баразной і Аляксандрам Мацеюком. Ім выставілі абвінавачанні паводле «групавой» часткі 3 арт. 328 КК («Незаконны абарот наркатычных сродкаў»). Мацеюка абвінавачваюць, апроч таго, паводле ч. 2 арт. 332 КК («Арганізацыя альбо ўтрыманне прытонаў для ўжывання наркотыкаў»). Зазначым, што ч.3 арт. 328 КК прадугледжвае пакаранне да 15 гадоў пазбаўлення волі.
«Прыняў стойку са сціснутымі кулакамі». У Віцебску за гвалт над міліцыянтамі судзяць дырэктара прадпрыемства
У судзе Першамайскага раёну Віцебску 6 верасня пачаўся працэс над 50-гадовым Міхаілам З. Дырэктара прыватнага прадпрыемства судзяць за гвалт альбо пагрозу ўжывання гвалту ў дачыненні да супрацоўніка органаў унутраных спраў (арт. 364 КК РБ). Паводле пракурора, мужчына «прыняў баявую стойку» і выказваў пагрозы на адрас міліцыянтаў. Цяпер яму пагражае да 7 гадоў пазбаўлення волі.
«Справакавалі на прыбіранне памяшкання». Палітвязню Ігару Банцэру дадалі яшчэ 10 сутак ШІЗА
5 верасня з ШІЗА віцебскай папраўчай установы адкрытага тыпу №9 пасля 30 сутак пакарання мусіў выйсці гарадзенскі панк-музыка Ігар Банцэр. Аднак, як стала вядома, музыка атрымаў чарговыя 10 сутак. Першапачаткова пасля ўзмацнення ціску з боку адміністрацыі Банцэр трапіў у штрафны ізалятар за адмову прыбіраць памяшканне.
Што трэба ведаць пра арганізацыю перадач для вязняў
За кратамі знаходзяцца сотні беларусаў, якія маюць патрэбу ў дапамозе і падтрымцы. Праваабаронцы з дапамогай сваякоў вязняў склаў практычны дапаможнік па перадачах у СІЗА і калоніі, які спросціць збор пасылак і перадач. Што класці ў перадачы, як іх перадаваць, якія лайфхакі ёсць апісана ў дапаможніку.
Актывіста Вадзіма Міхайлава затрымалі ў Наваполацку за налепку з Пагоняй
3 верасня ў Наваполацку затрымалі прафсаюзнага актывіста Вадзіма Міхайлава. Мужчына быў затрыманы супрацоўнікамі ДАІ падчас абедзеннага перапынку, калі выехаў у горад на сваім аўтамабілі. Міхайлава адвезлі ў ГАУС Наваполацку, адкуль ён ужо не выйшаў. Як паспеў паведаміць Вадзім Міхайлаў, прычынай затрымання стала налепка з Пагоняй на багажніку ягонага аўто.
Вахцёрку інтэрната асудзілі на паўтара года «хіміі» – абразіла ў Instagram сяржанта міліцыі Шнявіна
У судзе Чыгуначнага раёну Віцебску 3 верасня адбыўся разгляд яшчэ адной крымінальнай справы за публічную абразу прадстаўніка ўлады (арт. 369 КК). Гэтым разам на лаве падсудных апынулася 51-гадовая Вера Струніна, якая працуе вахцёркай у віцебскім інтэрнаце. За кароткі каментар на адрас ужо былога міліцыянта з Віцебску суддзя Дзяніс Аляксеенка прысудзіў ёй 1 год і 6 месяцаў «хіміі». Пракурор Антон Гарохаў прасіў пакараць трыма гадамі. Ад адваката жанчына адмовілася.
Палітзняволенай Юліі Кашаверавай не задаволілі просьбу аб памілаванні
Палітзняволенай віцяблянцы Юліі Кашаверавай адмовілі ў памілаванні. Як паведаміў бацька Юліі, прашэнне аб памілаванні напісала ейная бабуля. Камісія ў пытаннях памілавання і вызвалення ад крымінальнай адказнасці прашэнне разгледзела, але не задаволіла. Як паведамлялася раней, Кашаверава ўжо дасылала прашэнне аб памілаванні ў так званы "Круглы стол дэмакратычных сіл" (КСДС), які ўзначальвае Юрый Васкрасенскі.
Камітэт ААН па правах чалавека зарэгістраваў скаргу актывісткі Наталлі Трошчанкі
26 жніўня 2021 Камітэтам ААН па правах чалавека пад нумарам 4000/2021 была зарэгістраваная скарга Наталлі Трошчанкі. Грамадзянская актывістка мяркуе, што беларуская дзяржава парушыла яе правы на свабоду слова і мірныя сходы.
Жыхар Віцебску, які абяцаў перамагчы Лукашэнку на выбарах, абскарджвае змяшчэнне ў «псіхушку»
2 верасня ў судзе Першамайскага раёну Віцебску прайшло закрытае судовае паседжанне, на якім разглядалася скарга «на затрыманне, заключэнне пад варту, хатні арышт, падаўжэнне тэрміну ўтрымання пад вартай і дамашняга арышту, а таксама – на прымусовае змяшчэнне ў судова-псіханеўралагічны экспертны стацыянар». Абвінавачаны і скаржнік – Уладзімір Мунякін, які набыў у Віцебску вядомасць, дзякуючы напаўфантастычным праектам. Адным з такіх было абяцанне перамагчы на прэзідэнцкіх выбарах.