«Экстрэмісцкай інфармацыйнай прадукцыяй» прызналі старонку віцебскіх навін ў TikTok
На сайце Міністэрства інфармацыі абнавіўся спіс «экстрэмісцкай» інфармацыйнай прадукцыі. Там згаданы і TikTok-аккаунт «pravtb», прызнаны «экстрэмісцкім» па рашэнні Лідскага раённага суда Гродненскай вобласці ад 20 верасня. Гэты акаўнт мае 35 з паловай тысяч падпісчыкаў.
У Віцебску і 10 раёнах вобласці ў жніўні знізіўся сярэдні заробак
Гэта вымушана канстатаваць афіцыйная статыстыка: упершыню за досыць працяглы час не даводзіцца пахваліцца ростам заробку, хай сабе нават і сярэдняга. У жніўні намінальны налічаны сярэдні заробак у Віцебскай вобласці склаў 1998 рублёў 40 капеек. Гэта на 9 рублёў 80 капеек менш за ліпеньскі заробак. Зніжэнне заработнай платы ў жніўні ў параўнанні з ліпенем адбылося ў 10 раёнах і самім абласным цэнтры.
Віцебскі гарвыканкам інфармуе пра страляніну ў горадзе
Менавіта так можна акрэсліць афіцыйнае паведамленне наконт правядзення актыўнай фазы навучальнага збору ваеннаабавязаных тэрытарыяльных войскаў з 23 па 30 верасня 2024 г. па вул. Максіма Горкага (раён Рачнага порта). Грамадзян просяць паставіцца да вучэнняў з разуменнем і захоўваць спакой. Але гарадскія ўлады не паведамляюць, як трэба дзейнічаць цывільнаму насельніцтву ў выпадку надзвычайнай сітуацыі.
У Віцебску будзе ажыццяўляцца практычная адпрацоўка тактычных заданняў і праводзіцца стральба са стралковай зброі, інфармуе гарвыканкам. Але ў дадзенай сітуацыі можа ўзнікнуць шэраг пытанняў наконт паўнаты і якасці прадстаўленай інфармацыі. Зварот да грамадзян аб правядзенні ваенных вучэнняў і стрэльбах па вул. Максіма Горкага без прадастаўлення кантактаў для экстранай сувязі і тлумачэнняў, як дзейнічаць у выпадку надзвычайнага здарэння, выглядае няпоўным і недастаткова інфарматыўным. Гэта можа выклікаць у насельніцтва неспакой і незадаволенасць.
25 верасня пройдуць акцыі салідарнасці з Алесем Бяляцкім
Сёлета 25 верасня лідару праваабарончага цэнтра «Вясна» Алесю Бяляцкаму спаўняецца 62 гады. Свой дзень народзінаў ён ізноў сустракае ў зняволенні. Раней ён ужо быў вязнем уладаў за сваю праваабарончую і грамадскую дзейнасць - з 2011 па 2014 год. У ліпені 2021 года яго зноў затрымалі — і з таго часу ён прайшоў праз следчы ізалятар і суд, які прысудзіў яму 10 гадоў пазбаўлення волі. Алесь Бяляцкі адбывае свой тэрмін у папраўчай калоніі №9 у г. Горкі, куды накіроўваюць «рэцыдывістаў».
На тэрыторыі сельсавета, які святкуе 100-гадовы юбілей, не могуць навесці парадак
Адмыслоўцы з аддзела землеўладкавання Дубровенскага райвыканкама правялі праверку на тэрыторыі Пірагоўскага сельсавета. Вывучалі, наколькі эфектыўна выкарыстоўваюцца землі гаспадарак, якая сітуацыя з нежылымі дамамі, ці дбайна падтрымліваецца парадак на тэрыторыях, падведамасных арганізацыям і сельскагаспадарчым прадпрыемствам. Давялося канстатаваць, што праблемы ёсць. Але літаральна праз некалькі дзён пра іх забыліся.
У Браславе з'явіўся «источник патриотизма»
У райцэнтры да Дня народнага адзінства адчынілі "Пляцоўку дзяржаўнай сімволікі" . На ёй размясцілі некалькі інфармацыйных стэндаў і тры флагштокі вышынёй 8 метраў - пад дзяржаўны сцяг, сцяг Віцебкай вобласці і сцяг Браслаўскага раёна. «Новая точка притяжения появилась в Браславе. Источник патриотизма, предмет гордости, место, где будут проводить разного рода тематические мероприятия», -- піша раённая газета "Браслаўскі край".
Віцяблянам паказалі «Валошніка» - талісман горада, які яны нібыта самі абралі
Фотаздымак «Валошніка», або «Васильковый маг» надрукавала газета «Віцьбічы». Аўтарка гэтага персанажа - віцебская студэнтка Настасся Мядзведзева. Яе прапанова перамагла ў конкурсе, які сёлета ў лютым абвясціў гарвыканкам, -- набольш спадабалася камісіі, створанай дзеля зацвярджэння персанажа-талісмана. Цяпер скульптуры «Валошнікаў» ( да 30 см вышынёй) павінны з'явяцца на вуліцах на ўзор гномаў ва Ўроцлаве. Гарвыканкам заклікае, каб прадпрыемствы і ўстановы прыдумлялі і ўсталёўвалі сваіх «Валошнікаў».
Віцебскія энтузіясты адрамантавалі дзесятак вуліц з дапамогай рэсурса petitions.by
І гэта толькі сёлета. А калі казаць больш шырока, то з дапамогай петыцый гарадскія актывісты дамагаліся ліквідавання снегавых заносаў і «векавых» лужын, дамагаліся закрыцця адчыненых каналізацыйных люкаў, звярталі ўвагу на недахопы ў падтрыманні гарадскіх аб'ектаў, выступалі за абнаўленне небяспечных для гульняў дзіцячых пляцовак.
На Лёзненшчыне квітнее хабарніцтва і расце колькасць махлярстваў
Гэта вымушана прызнаць раённая пракуратура пры падсумаванні вынікаў працы за першае паўгоддзе бягучага года. Паводле Пракурора Лёзненскага раёна Аляксея Бузікава, у рэгіёне павялічылася колькасць цяжкіх і асабліва цяжкіх злачынстваў, бо было выяўлена адразу некалькі крымінальных выпадкаў, якія падпадаюць пад арт. 430 Крымінальнага Кодэкса (хабарніцтва). У параўнанні з такім самым перыялам мінулага года (19) колькасць выяўленых выпадкаў хабарніцтва ўзрасла больш як у два разы (39).
Жыхары Паставаў скардзяцца на брыдкі выгляд вуліцы Ленінскай
Гэта адна з самых доўгіх вуліц у мястэчку, якая бярэ пачатак практычна на цэнтральнай плошчы. І зусім недалёка ад яе месціцца дом №32, краявід вакол якога здольны папсаваць самыя пазітыўныя ўражанні турыстаў. Мясцовыя жыхары звярнуліся ў раённую газету, каб «дастукацца» да камунальнікаў, якія забыліся на свае абавязкі.