4 лістапада сябры грамадскай ініцыятывы «Хайсы» наведалі ў ваколіцах Віцебску месцы расстрэлаў і пахавання рэпрэсаваных грамадзян. Дзень быў выбраны не выпадкова: 4 лістапада 1937 году ў Віцебску расстралялі 110 чалавек, сярод якіх былі мастакі Янка Гаўрыс, Яўхім Мінін, браты Пётр і Хрыстафор Даркевічы…

18-гадовая віцяблянка Сафія Цярэнцьева 29 кастрычніка зладзіла ў падтрымку рэпрэсаваных студэнтаў адзіночны пікет. У той жа дзень дзяўчына была адлічаная з тэхналагічнага каледжа, яе затрымалі і змясцілі ў СІЗА, дзе правяла трое сутак. 4 лістапада адміністрацыйную справу (ч.3 арт. 23.34 КаАП), заведзеную ў дачыненні Цярэнцьевай, пачаў разглядаць суд Кастрычніцкага раёну Віцебску.

Віцебскага актывіста Андрэя Кулакова, больш вядомага як уладальніка «Жывемабіля», суд Кастрычніцкага раёну Віцебску аштрафаваў 3 лістапада на 15 базавых велічынь за дробнае хуліганства (арт. 17.1 КаАП). Справу Кулакова разглядаў суддзя Мікалай Атрахімовіч.

У Дзень памяці 2 лістапада віцебскія актывісты наведалі мемарыяльнае месца расстрэлаў за часамі сталінізму мірных грамадзян Беларусі ля вёскі Паляі Віцебскага раёну. У гэты ж дзень наведалі вясковыя могілкі ў вёсцы Друкава, дзе пахаваны кіраўнік Віцебскай абласной рады КХП БНФ Уладзімір Плешчанка.

Суд Першамайскага раёну Віцебску 2 лістапада вынес папярэджанне 64-гадовай віцяблянцы Таццяне Зеляновай за ўдзел у мірным маршы 30 жніўня (ч.1 арт. 23.34 КаАП). Пенсіянерка назвала на судовым паседжанні выстаўленыя ў дачыненні яе абвінавачанні смеху вартымі.

30 кастрычніка Першамайскі суд Віцебску аштрафаваў віцебскую актывістку Таццяну Севярынец на 810 беларускіх рублёў (ч.3 арт. 23.34 КаАП). Суддзя Вераніка Барысава прызнала калектыўны паход у Віцебскі гарвыканкам несанкцыянаваным масавым шэсцем, хаця дэлегацыю з трох чалавек у гарадскім выканаўчым камітэце прынялі.

28 кастрычніка суд Кастрычніцкага раёну Віцебску аштрафаваў выкладчыцу юрыдычнага факультэта ВДУ Святлану Вашэцькову на 12 базавых велічынь па водле арт. 23.34 КаАП. Ніякіх істотных доказаў яе ўдзелу ў мірнай акцыі не было. Справу разглядаў суддзя Уладзімір Царыкаў.

28 кастрычніка суд Першамайскага раёну Віцебску адправіў адміністрацыйныя пратаколы ў дачыненні да журналіста «Белсату» Змітра Казакевіча на дапрацоўку. Справа разглядалася ў анлайн-рэжыме праз Skype. Разбіраў яе суддзя Міхаіл Юрчанка. Казакевіч быў затрыманы 25 кастрычніка і 72 гадзіны да суду правёў у ІЧУ, які месціцца зараз у будынку СІЗА-2.

26 кастрычніка суд Віцебскага раёну прызнаў даказаным віну Марыі Волкавай у правядзенні несанкцыянаванага пікетавання 26 верасня ў вёсцы Лучынаўка з 2 да 4 гадзін ночы. Для гэтага суддзі Міхаілу Зубені спатрэбілася тры судовыя паседжанні. Супраць Марыі Волкавай і Андрэя Кулакова было выстаўленае абвінавачанне паводле ч.1 арт. 23.34 КаАП. Справа ў дачыненні да Кулакова была спыненая.

Суд Кастрычніцкага раёну Віцебску аштрафаваў на 6 базавых велічынь 19-гадовую навучэнку каледжу Марыю Амасовіч, якая ад 20 кастрычніка знаходзіцца ў СІЗА. Нягледзячы на такое рашэнне, з ізалятару дзяўчыну не выпусцілі: яе зноў затрымалі па новых пратаколах. Марыя застанецца за кратамі да панядзелка.