У Віцебску затрымалі Барыса Хамайду
Грамадзкага актывіста Барыса Хамайду затрымалі за несанкцыянаванае пікетаваньне каля так званага «Сіняга дому» — дому № 28 па вуліцы Леніна, дзе каля ўваходу ў краму «Веста» ён ужо даўно і стала распаўсюджвае незалежную прэсу. Віцебскага апазыцыянэра адвезьлі ў міліцыю Чыгуначнага раёну Віцебску. Праўда, праз паўгадзіны і адпусьцілі, не складаючы пратаколу.
Віцебскі абласны суд ігнаруе ўказ прэзыдэнта Рэспублікі Беларусь?
Згодна з указам кіраўніка Беларусі «Аб мерах па ўдасканаленьні выкарыстаньня нацыянальнага сэгмэнту сеціва Інтэрнэт», «дзяржаўныя органы і арганізацыі забясьпечваюць стварэньне, функцыянаваньне і сыстэматычнае абнаўленьне інтэрнэт-сайтаў з выкарыстаньнем інфармацыйных сетак, сыстэм і рэсурсаў нацыянальнага сэгмэнту сеціва Інтэрнэт, разьмешчаных на тэрыторыі Рэспублікі Беларусь». Аднак, здаецца, віцебскаму абласному суду ўказ прэзыдэнта – ня ўказ. Яго сайт фізычна размешчаны не ў Беларусі, а ў Эстоніі…
Віцебчукі шукаюць паратунку ў ідэях расейскага імпэрыялізму
У касах канцэртнай залі «Віцебск» кажуць, што на «Духоўныя гутаркі» Івана Ахлабысьціна, імпрэзу, якая мае адбыцца 12 кастрычніка, усе квіткі былі прададзеныя яшчэ тыдні два таму. «Што ж вы сьпіце ўсе? Цяпер пільнуйце — можа, хто здаваць будзе», — параіла касір. Квіткі на «Духоўныя гутаркі» Ахлабысьціна каштавалі ад 120 да 280 тысяч рублёў. Вялікая заля КЗ «Віцебск» разьлічаная на 1100 глядацкіх месцаў.
Віцебская актывістка незалежнага прафсаюзу судзіцца з адвакатамі
Сябра прафсаюзу РЭП Алена Шандзюкова зьвярнулася з пазовам у суд, каб спагнаць зь юрыдычнай кансультацыі № 2 Віцебску і Віцебскай абласной калегіі адвакатаў па адным мільёне рублёў маральнай шкоды. Прычынай такога беспрэцэдэнтнага пазову сталі адмова адваката Натальлі Станкевіч ў аказаньні юрыдычнай дапамогі актывістцы і пазыцыя намесьніка Віцебскай абласной калегіі адвакатаў Алены Барашкавай, якая заклікала спадарыню Шандзюкову наогул адмовіцца ад разгляду яе грамадзянскай справы ў судзе.
За скаргу ў Мінздраў актывіст ледзь ня трапіў у вар’ятню
Віцебскі сябра незарэгістраванай партыі «Белая Русь» Аляксандар Кірылаў праходзіў курс лячэньня ў Рэспубліканскім шпіталі спэлеалячэньня ў Салігорску. Адтуль ён патэлефанаваў на «гарачую лінію» ў Міністэрства аховы здароўя і паскардзіўся на факты п’янак у клініцы, парушэньне правілаў унутранага распарадку, неаказаньне хворым на бясплатнай аснове мэдычных паслуг. Актывіста выслухалі і параілі вырашыць ўсе пытаньні на месцы. Неўзабаве ж пасьля таго, як ён паспрабаваў зрабіць гэта, яму прыйшлося кінуць свае манаткі ў шпіталі і ўцякаць на перакладных дадому ў Віцебск.
Віцебскую вобласьць ратуюць мігранты
Паводле стану на 1 верасьня колькасьць насельніцтва Віцебскай вобласьці склала 1 млн. 204,4 тысячы чалавек і за жнівень не зьмянілася. Другі месяц Віцебшчына радуе адсутнасьцю адмоўных паказчыкаў. Праўда, як і ў ліпені, абумоўлена гэта не натуральным прыростам насельніцтва (перавышэньне нараджальнасьці над сьмяротнасьцю), а міграцыйным прыростам.
Павал Севярынец: Абражаць і крыўдзіць людзей - натура Лукашэнкі
«Пра маральнасьць і паліткарэктнасьць у дачыненьні да асобы з боку Лукашэнкі размова проста не ідзе. Гэта два паралельных сьветы, якія не перасякаюцца. Нават калі Лукашэнка хоча здацца сумленным і прыстойным палітыкам, то ў яго не атрымліваецца: увесь час вылазіць унутраная натура. З гэтым нічога ня зробіш - яна такая, якая ёсьць», - гэтак палітвязень Павал Севярынец пракамэнтаваў расісцкае выказваньне Аляксандра Лукашэнкі ў адрас Барака Абамы.
Віцебскаму актывісту БНФ паведамілі на працы, што больш «ня маюць патрэбы ў ягоных паслугах»
Пра гісторыю свайго звальненьня распавёў сябар партыі БНФ Аляксандар Ільінец, які працаваў майстрам у брыгадзе цэху ўласнай вытворчасьці ў краме №139 гандлёвай сеткі “Веста”, займаўся выпечкай хлеба-булачных і кандытарскіх вырабаў. Ён цьвердзіць, што нараканьняў на сваю працу з боку кіраўніцтва ня меў, але пасьля таго, як стала вядома пра ягоны ўдзел у кампаніі “Зробім лепш”, пачаліся праблемы. Паводле словаў актывіста, яму прапанавалі разьвітацца з працай - “па-добраму”, пасьля тэлефанаваньня дырэктарцы крамы.
Рабочыя прадпрыемства «Полацак-Шкловалакно» харчуюцца ў неналежных умовах
Адміністрацыя ААТ “Полацак-Шкловалакно” сьцьвярджае, што праблеме гарачага харчаваньня на прадпрыемстве надаецца самая сур’ёзная ўвага. Маўляў, сталоўкі, кулінарыя, малочны пункт забясьпечваюць завадчан якаснай ежай, выпечкай, прадуктамі, у цэхах абсталююцца пакоі прыёму ежы, куды набываюцца неабходныя электрапрыборы. Аднак у цэху № 7 пакою прыёму ежы дагэтуль няма, хаця інтэнсыўнасьць працы работнікаў цэху вельмі высокая, і не заўсёды ёсьць час схадзіць у сталоўку.
Актывіст Леанід Здрэстаў дамогся пакараньня віцебскіх судзьдзяў
Двойчы Віцебскі абласны суд адмяняў пастановы, вынесеныя судзьдзямі суду Кастрычніцкага раёну Віцебску, аб адмове распачаць справы паводле скаргаў жыхара Віцебскага раёну Леаніда Здрэстава супраць УП «Віцебскаблгаз». Таксама двойчы скаргі актывіста ўсё-такі разглядаліся ў судовых паседжаньнях, рашэньні па іх прымаліся – не на карысьць актывіста, але потым гэтыя рашэньні аблсудом былі прызнаныя незаконнымі і скасаваныя. У выніку актывіст паскардзіўся ўжо на судзьдзяў. Ён напісаў Лукашэнку, і быў пачуты: у дачыненьні да дваіх судзьдзяў прынятыя меры ўзьдзеяньня.