Уладзімір Пярцоў выступіў паред моладдзю «з пратэстным патэнцыялам»
Намеснік кіраўніка адміністрацыі прэзідэнта правёў сустрэчу ў ВДТУ. Падчас размовы са студэнтамі і выкладчыкамі «тэхналожкі» ён гаварыў пра неабходнасць працы з моладдзю напярэдадні прэзідэнцкіх выбараў, бо моладзь мае «пратэстны патэнцыял». І калі маладых людзей належным чынам ідэалагічна не «апрацаваць», то гэта, маўляў, зробяць апаненты ўлады.
У Бешанковічах ў падтрымку Лукашэнкі на выбарах выступіў Дзмітрый Паўлічэнка – сілавік, вядомы ўдзелам у стварэнні і кіраванні «эскадронамі смерці»
Кіраўніка таемнага фармавання, якое ў 1990-х гадах забівала апанентаў Аляксандра Лукашэнкі, запрасілі выступаць у тым ліку і перад дзецьмі. Ён распавядаў вучням і настаўнікам бешанковіцкай СШ№2 пра тое, што яму таксама давялося «бараніць краіну», і чаму ён адданы Аляксандру Лукашэнку. Бо, маўляў, ён 30 год стаіць за Беларусь і «выканаў усе абяцанні, якія даваў народу ў 90-я гады».
Са школьнікамі ў Глыбоцкім раёне гулялі «у выбары»
У Карабоўскай сярэдняй школе ў межах праекта «Азбука гражданина. Версия 5.0» школьнікаў вучылі галасаваць, а камусьці нават пашчасціла пабыць «кандыдатам» або «старшынём выбарчай камісіі». З дзецьмі «прайшлі» усе этапы выбарчай кампаніі – ад рэгістрацыі ініцыятыўных груп да падліку галасоў.
Суды Віцебшчыны за 5 дзён прызналі «экстрэмісцкімі» 23 інтэрнэт-рэсурсы
Звесткі пра гэта ўнесены ў Рэспубліканскі спіс экстрэмісцкіх матэрыялаў на сайце Міністэрства інфармацыі. Асабліва «пашчыравалі» мінулымі днямі суды Кастрычніцкага і Чыгуначнага раёнаў абласнога цэнтра і суд Сенненскага раёна – ён за адзін дзень, 13 студзеня, прысвоіў статус «экстрэмісцкай інфармацыйнай прадукцыі» 8-мі старонкам на розных платформах.
Прыхільніцу «русского мира» Эльвіру Мірсалімаву таксама выклікалі на прафілактычную гутарку перад выбарамі
Пра гэта яна паведаміла ў сваім Тэлеграм-канале, заўважыўшы, што выклік быў праз тэлефон і размаўлялі з ёй «не зусім тактоўна». Кепскі настрой супрацоўніка міліцыі Мірсалімава патлумачыла тым, што ў краіне вельмі шмат асуджаных па палітычных «адміністратыўках» - і яна ў тым ліку. А значыць, усіх гэтых людзей трэба «прафілактаваць» перад 26 студзеня.
Тэлеканал АНТ паказаў праграму з удзелам журналіста -палітвязня Андрэя Кузнечыка
14 студзеня выйшла першая серыя “расследавання” пра супрацоўнікоў “Радыё Свабода”. Яе героем быў палітвязень, фрылансер Андрэй Кузнечык, якога на некалькі месяцаў перавезлі з Наваполацкай ПК №1 у Мінск адмыслова для здымак «фільма».
Зачынілася група «Навіны Віцебска» - самая шматлікая віцебская суполка ў Facebook
Заснавальніца і адміністратарка групы Таццяна Мацвеева напісала, што не можа наўпрост паведаміць прычыны закрыцця пабліка, які праіснаваў тры з паловай гады. Але падкрэслівае, што робіць гэта па не залежных ад яе прычынах. Яна вырашыла, што пакуль праца групы прыпынена на месяц, але далейшыя перспектывы застаюцца няяснымі.
Сайт «Народныя Навіны Віцебска» прызналі «экстрэмісцкім»
У Рэспубліканскі спіс экстрэмісцкіх матэрыялаў на сайце Міністэрства інфармацыі трапілі таксама звязаныя з ім старонкі ў сацыяльных сетках. Рашэнне лічыць гэтыя рэсурсы «экстрэмісцкай» інфармацыйнай прадукцыяй 10 студзеня прыняў суд Кастрычніцкага раёна Віцебска.
Дзяржаве трэба грошы. З 1 лютага ў Віцебскай вобласці працягваюць спагнанне памежнага збору
Збор грошай за перасячэнне мяжы на аўтатранспарце будзе афіцыйна працягнуты з наступнага месяца. Так вырашыў Віцебскі аблсавет, прыняўшы рашэнне №69 ад 30.12.2024 года. Тэрмін дзеяння, на працягу якога будуць браць збор, у рашэнні не ўказаны. Раней ён падаўжаўся кожныя паўгода, але летась мясцовыя ўлады атрымалі права ўвесці бестэрміновы збор, што ўжо зрабіў Віцебскі абласны Савет дэпутатаў.
У Оршы схавалі не толькі асабістыя дадзеныя чальцоў выбарчых камісій, але і іхныя твары
Раённая газета апублікавала інфармацыю пра трэнінг для чальцоў выбарчых камісій, якіх навучалі, як дзейнічаць «у пазаштатных сітуацыях». На сайце выдання не гаворыцца пра тое, чаго канкрэтна варта апасацца ўдзельнікам выбарчых камісій падчас датэрміновага галасавання або ў асноўны дзень прэзідэнцкіх выбараў. Але ў фотарэпартажы да артыкула яны знятыя так, што пазнаць гэтых людзей цяжка. А месцамі твары і ўвогуле «замыленыя»...