Праваабаронца Павал Левінаў зьвярнуўся да старшыні ЦК па выбарах Лідзіі Ярмошынай з просьбай адмовіць Лукашэнку ў рэгістрацыі ў якасьці кандыдата на прэзыдэнцтва. На падставе таго, што прэтэндэнт у кандыдаты Лукашэнка выказвае пагрозы жыцьцю простых выбарцаў, папрасіў таксама Ярмошыну паскардзіцца на яго ў Сьледчы камітэт. Ярмошына даслала ліст у адказ.

9 чэрвеня ў судзе Чыгуначнага раёну Віцебску палічылі даказаным факт удзелу віцебскага актывіста Аляксандра Ільінца ў не дазволеным уладамі пікетаваньні з выкарыстаньнем плякату «Свабоду Ціханоўскаму!» і выявай перакрэсьленага прусака. Судзьдзя Алена Цыганкова аштрафавала актывіста на 40 базавых велічыняў. Між тым, Ільінец зьяўляецца сябрам ініцыятыўнай групы Ганны Канапацкай.

9 чэрвеня ў доме затрыманага раней актывіста «Краіны для жыцьця» Андрэя Новікава ў вёсцы Прусы Пастаўскага раёну адбыўся вобшук. Пра гэта паведаміла жонка затрыманага Вольга. «Размаўляць з вамі зараз не магу, у нас – ператрус», – паведаміла па тэлефоне жонка актывіста.

Судзьдзя суду Кастрычніцкага раёну Віцебску Уладзімер Царыкаў палічыў, што актывіст «Народнай Грамады» Аляксандар Якушкоў браў удзел у несанкцыянаваным масавым мерапрыемстве 31 траўня і прысудзіў яго да 10 сутак адміністрацыйнага арышту паводле часткі 3-й артыкулу 23.34 КаАП. Суд адбыўся ў анлайн-рэжыме 9 чэрвеня.

8 чэрвеня на сустрэчу з Валерам Цапкалам у Віцебску, якая адбылася каля ТЦ «Марка-сіці», прыйшло ня менш за 300 віцяблянаў. Свой выступ палітык пачаў з закліку ставіць свае подпісы за ўсіх прэтэндэнтаў у кандыдаты на прэзыдэнцтва – без выключэньня. Цапкала мяркуе, што такі падыход дасьць магчымасьць кожнаму зь іх рэпрэзэнтаваць свой вобраз Беларусі будучага, каб разумець, у якім напрамку рухацца.

Віцебкую блогерку Алену Янушкоўскую, якую затрымалі 5 чэрвеня і да суду зьмясьцілі ў ізалятар часовага ўтрыманьня, прызналі сёньня вінаватай ва ўдзеле ў несанкцыянаваным мітынгу, які, паводле міліцыі, адбыўся ў Віцебску 31 траўня. Суд Віцебскага раёну аштрафаваў жанчыну на 40 базавых велічынь. Яшчэ двух актывістаў – Алега Паўлава і Аляксандра Мацеюка прысудзілі адпаведна да 5 і 7 сутак адміністрацыйнага арышту.

Увечары 6 чэрвеня ў Віцебску затрымалі Аляксандра Мацеюка – валянтэра ініцыятыўнай групы па зборы подпісаў за Сьвятлану Ціханоўскую. З аддзяленьня міліцыі ён пасьпеў паведаміць праваабаронцам, што на яго складаюць пратакол паводле артыкулу 23.34 КаАП і вінавацяць ва ўдзеле ў несанкцыянаваным пікетаваньні 31 траўня. Праз гадзіну тэлефон Мацеюка быў ужо недасяжны.

У вёсцы Прусы Пастаўскага раёну за ўдзел у пікеце для збору подпісаў быў затрыманы мясцовы актывіст Андрэй Новікаў. Яго затрымалівала цэлая група супрацоўнікаў проста ўдома. Новікава адвезьлі ў Паставы і пасьля складаньня пратаколу зьмясьцілі да суду ў ізалятар. Суд адбудзецца ў панядзелак.

У Віцебску працягваюцца затрыманьні ўдзельнікаў пікетаваньня для збору подпісаў 31 траўня, на якім прысутнічаў палітык Павал Севярынец. Пасьля складаньня пратаколаў Алену Янушкоўскую, Алега Паўлава, Яраслава Кійко і Аляксандра Якушкова зьмясьцілі да судоў у віцебскі ізалятар часовага ўтрыманьня (ІЧУ). Праз колькі гадзін Кійко адпусьцілі – у яго была падвышаная тэмпэратура.

Удзельнікаў пікетаваньня для збору подпісаў у Віцебску 31 траўня, на якім прысутнічаў сузаснавальнік БХД Павал Севярынец, пачалі выклікаць у аддзяленьні міліцыі для складаньня пратаколаў. На некаторых – ужо склалі. Грамадзян абвінавачваюць ва ўдзеле ў несанкцыянаваным масавым мерапрыемстве (арт. 23.34 КаАП).