Скаргу віцябляніна Міколы Качурца на пастанову суду Кастрычніцкага раёну, які пакараў актывіста штрафам у памеры 30 б.в., разгледзела 25 красавіка судзьдзя Ірына Смалякова. Паседжаньне доўжылася тры хвіліны. Скаргу не задаволілі, пастанову суду Кастрычніцкага раёну пакінулі бязь зьменаў.

18 красавіка судзьдзя Віцебскага абласнога суду Сьвятлана Іванова разгледзела скаргу сябра грамадзкай ініцыятывы «Хайсы» Андрэя Кешанюка на рашэньне суду Першамайскага раёну. Мясцовы актывіст быў пакараны 26 сакавіка судзьдзёй Натальляй Карабліной за нібыта правядзеньне несанкцыянаванага пікету пад бел-чырвона-белым сьцягам каля будынку «Белтэлекаму» і непадпарадкаваньне супрацоўнікам праваахоўных органаў.

Больш за 2000 рублёў запазычанасьці, якая ўтварылася за тры гады, павінна выплаціць полацкай ЖКГ Тахміна Міхайлава за тое, што работнікі РКЦ няправільна аформілі статус яе кватэры ў 2014 годзе, зрабіўшы памылку ў разьліку. Такое рашэньне вынесла полацкая судзьдзя Аксана Мішута 12 сакавіка. Цяпер рашэньне набыло моц, і з заробку Міхайлавай, які складае каля 400 рублёў, на карысьць ЖКГ будуць утрымліваць 20% паводле выканаўчага ліста.

Калегія Віцебскага абласнога суду пакінула бязь зьменаў прысуд суду Кастрычніцкага раёну Віцебску ў дачыненьні да актывіста Пятра Іванова. Судовае паседжаньне, на якім старшыняваў судзьдзя Бондараў, скончылася меней чым праз гадзіну і праходзіла без адваката і прадстаўнікоў другога боку.