Пятніца, 28 Май 2021

Таццяне Туравец – тры гады «хіміі». На абвяшчэнне прысуду яна не прыйшла

Ацаніць гэты матэрыял
(1 голас)
Таццяна Туравец Таццяна Туравец

28 траўня суд Віцебскага раёну вынес абвінаваўчы прысуд у дачыненні да выхавальніцы ў дзіцячым садку Таццяны Туравец. Суддзя Наталля Траццякова прызнала жанчыну вінаватай паводле арт. 364 КК («Гвалт альбо пагроза ўжывання гвалту ў дачыненні да супрацоўнікаў органаў унутраных спраў») і пакарала трыма гадамі абмежавання волі («хімія»). На абвяшчэнне прысуду Туравец, якая знаходзіцца пад падпіскай аб нявыездзе, не прыйшла.

Суд пастанавіў таксама спагнаць з Таццяны Туравец на карысць пацярпелага міліцыянта Аляксея Старчанкі ў кошт кампенсацыі маёмаснай шкоды за нібыта пракушаную пальчатку 16 рублёў 15 капеек. У даход дзяржавы ў якасці пошліны – 58 рублёў і працэсуальныя выдаткі – 128 рублёў 24 капейкі.

Маёмасць Туравец – мабільнік, тэлевізар і пральную машынку LG – суд пакінуў пад арыштам да выплаты накладзенага спагнання.

Працэс над Таццянай Туравец пачаўся 3 траўня. Для прыняцця рашэння суду спатрэбілася шэсць паседжанняў. Паводле абвінавачвання, у ноч з 9 на 10 лютага Туравец перашкаджала міліцыянтам праводзіць санкцыянаваны пракурорам ператрус, чыніла супраціў, пагражала фізічнай расправай, абражала. А пры затрыманні – укусіла міліцыянтаў за пальцы, аднаго з іх ударыла нагой.

Сваёй віны 50-гадовая Таццяна Туравец не прызнала і ў апошнім слове заявіла, што лічыць сябе пацярпелай. У жанчыны былі выяўленыя пашкоджанні сухажылляў пляча, з гэтай прычыны яна лячылася.

Нагадаем, што дзяржабвінаваўца Мікіта Раманоўскі прасіў для жанчыны 3 гады пазбаўлення волі з адбываннем пакарання ў папраўчай калоніі ва ўмовах агульнага рэжыму. Але суддзя Наталля Траццякова вынесла іншае рашэнне: тры гады абмежавання волі з накіраваннем у папраўчую ўстанову адкрытага тыпу. Да набыцця прысудам законнай моцы Таццяна Туравец будзе знаходзіцца пад падпіскай аб нявыездзе.

На абвяшчэнні прысуду Таццяна Туравец адсутнічала.

С. Горкі