На сярэдзіну кастрычніка 2021 году беларускія праваабарончыя арганізацыі прызналі палітвязнямі больш за 800 чалавек. Сярод асуджаных - мужчыны і жанчыны, маладыя і пажылыя - з вялікіх і малых гарадоў і вёсак. Усе яны патрапілі ў складаную жыццёвую сітуацыю праз тое, што мірна адстойвалі права на свабодныя і справядлівыя выбары.

Прадстаўнікі беларускай праваабарончай супольнасці прызналі актывіста з Дуброўна Міхаіла Чамураку палітычным зняволеным. 7 ліпеня 2021 году Дубровенскі раённы суд прызнаў мужчыну вінаватым у паклёпе (арт. 188 КК) і прыгаварыў да трох гадоў абмежавання волі з накіраваннем у папраўчую ўстанову адкрытага тыпу («хімія»). Пакаранне пачаў адбываць ад 10 кастрычніка.

33-гадовы аўтар ютуб-каналу Шэры Кот - палітвязень Зміцер Казлоў, напісаў у лісце з папраўчай калоніі № 2, што поўнасцю застаўся без падтрымкі. Пра гэта паведаміла праваабаронца з Воршы Паліна Сцепаненка, якая пасля доўгага перапынку атрымала ліст ад Шэрага Ката, піша Радыё Свабода.

Палітвязень Яўген Харашкевіч з Наваполацку, якому Віцебскі абласны суд прысудзіў 4 гады калоніі, прызнаўшы вінаватым па трох крымінальных артыкулах, знаходзіцца зараз у санчастцы СІЗА-2 у Віцебску. Пра гэта паведаміў бацька палітвязня. Пасля суду ён быў на спатканні з сынам, але брата Яўгена праз нейкі час на спатканне з ім ўжо не пусцілі: паведамілі, што ён «прыхварэў», але нібыта неўзабаве мае ўжо выпісацца.