4 сакавіка ў межах двухдзённага візыту ў Віцебск Часовы павераны ў справах Каралеўства Нідэрлянды ў Рэспубліцы Беларусь спадар Хэнрыкус Ёханэс ван Оостэрхаўт сустрэўся з праваабаронцамі Паўлам Левінавым і Леанідам Сьвецікам, а таксама з журналісткай і сябрам БАЖ Аленай Сьцяпанавай.

Прапанова ўвесьці абавязковае анкетаваньне бацькоў будучых першаклясьнікаў для вызначэньня мовы навучаньня іх дзяцей прагучала 5 сакавіка на сходзе Віцебскай гарадзкой арганізацыі «Таварыства беларускай мовы імя Францішка Скарыны» (ТБМ). З гэтай прапановай сябры арганізацыі зьвернуцца ў гарадзкі аддзел адукацыі.

Віцебскія праваабаронцы Павал Левінаў і Леанід Сьвецік зьвярнуліся з просьбай да адміністрацыі СІЗА №2 даць ім кароткатэрміновае спатканьне з палітвязьнем Міхаілам Жамчужным, а таксама дазволіць зрабіць для яго перадачу і пералічыць на ягоны асабісты рахунак сродкі. Праваабаронцам далі дазвол толькі на пералік грошай.

Былы дырэктар ААТ «ВІЗАС» прызнаны вінаватым у крадзяжах, злоўжываньні службовымі паўнамоцтвамі і нявыплаце алімэнтаў на траіх дзяцей. Пяць з паловай гадоў ён правядзе ў калёніі ва ўмовах узмоцненага рэжыму, паведамляюць «Народныя навіны Віцебску».

У дачыненьні да відэаблогеркі Вольгі Жураўскай («Снимать разрешено») распачатая крымінальная справа за публічную абразу прадстаўніка ўлады ў сувязі з выкананьнем ім службовых абавязкаў (арт. 369 КК РБ). Блогерцы пагражае да трох гадоў абмежаваньня волі.

Полацкага актывіста і блогера Алеся Круткіна мусяць вызваліць зь віцебскага ізалятара часовага ўтрыманьня (ІЧУ) 12 сакавіка. Пра гэта «Віцебскай Вясьне» паведаміла маці Алеся, якая ў панядзелак 2 сакавіка перадала сыну харчовую перадачу. У які дакладна час выпусьцяць Алеся, пакуль невядома.

Старшыня АГП Мікалай Казлоў 28 лютага правёў сустрэчу з грамадзкасьцю Віцебску. Сустрэча прайшла напярэдадні заплянаванай працэдуры праймэрыз, якая мусіць вызначыць асобу адзінага кандыдата ад дэмакратычных сіл на сёлетніх прэзыдэнцкіх выбарах. У Віцебску народнае галасаваньне мусіць адбыцца 7 сакавіка.

У 2019 годзе суд Полацкага раёну і гораду Полацку разгледзеў 66 пазоваў аб высяленьні наймальнікаў памяшканьняў дзяржаўнага жылфонду і іхных сем’яў без забесьпячэньня іншым жыльлём. 34 пазоўныя заявы задаволеныя, 29 неплацельшчыкаў за камунальныя паслугі ўжо выселеныя з дамоў, па сутнасьці – выкінутыя на вуліцу.

Вядомыя беларускія блогеры апублікавалі ў сеціве зварот у падтрымку актывіста Алеся Круткіна, які адбывае зараз адміністрацыйны арышт у Віцебску. У звароце патрабуюць ад уладаў спыніць неабгрунтаваны ціск на незалежных блогераў і журналістаў і неадкладна вызваліць Алеся Круткіна.

У сераду 26 лютага Віцебск з афіцыйным візытам наведала амбасадарка Швэцыі ў Беларусі Крысьціна Юханэсан. Разам зь першым сакратаром дыппрадстаўніцтва Конрадам Рыкардсанам яны наведалі шэраг прадпрыемстваў і ўстановаў гораду, зрабілі візыты да гарадзкіх і абласных органаў ўлады і асобна сустрэліся зь віцебскімі праваабаронцамі Паўлам Левінавым і Леанідам Сьвецікам.