У Віцебску перад выходнымі і асноўным днём галасаваньня пачалі затрымліваць актывістаў «Краіны для жыцьця» і незалежных назіральнікаў. 7 жніўня былі затрыманыя блогерка Алена Янушкоўская і яе дачка Юлія Ўласенка. Пасьля складаньня пратаколаў іх абедзьвюх да 10 жніўня зьмясьцілі ў ізалятар часовага ўтрыманьня (ІЧУ).

Віцебскі актывіст «Народнай Грамады» і валянтэр каманды Ціханоўскай Аляксандар Якушкоў быў затрыманы 4 жніўня і зьмешчаны ў ізалятар часовага ўтрыманьня. За кратамі ён мусіць правесьці 8 сутак арышту, якія яму прысудзілі за ўдзел у перадвыбарчых пікетаваньнях і якія ня далі адбыць напоўніцу да выбараў. Пра гэта паведаміў «Віцебскай Вясьне» паплечнік Якушкова Алег Паўлаў.

У панядзелак 3 жніўня быў затрыманы віцебскі актывіст Уладзімер Кійко. Яго зьмясьцілі ў ізалятар часовага ўтрыманьня (ІЧУ) адбываць арышт, які яму прысудзілі яшчэ 7 ліпеня за ўдзел у «ланцугу салідарнасьці». Пра затрыманьне паведаміў брат Уладзімера Яраслаў, зь якім яны меліся сёньня зарэгістравацца назіральнікамі на выбарах.

У Віцебску 6 ліпеня быў затрыманы каардынатар ініцыятыўнай групы Сьвятланы Ціханоўскай Уладзімер Кійко. Зь міліцыі яму паведамілі, што ў яго дачыненьні вядзецца адміністрацыйны працэс і запрасілі для дачы тлумачэньняў у Кастрычніцкі РАУС Віцебску. З аддзяленьня міліцыі актывіста ўжо ня выпусьцілі…