Таксама прыменена спецыяльная канфіскацыя мабільнага тэлефона "Apple iPhone 12 Pro", як сродка ўчынення злачынства, паведаміла прэсавая служба абласнога суда.

Прысуд Аляксандру Рандарэнку, вынесены 23 снежня, не ўступіў у законную сілу і можа быць абскарджаны.

Паводле афіцыйнай інфармацыі з абласной пракуратуры, 38-гадоваму віцебскаму лекару «інкрымінавана 19 эпізодаў наўмысных дзеянняў, накіраваных на ўзбуджэнне расавай, нацыянальнай і сацыяльнай варожасці і варожасці па прыкмеце іншай расавай, нацыянальнай і сацыяльнай прыналежнасці, а таксама наўмысных дзеянняў па рэабілітацыі нацызму». Паводле матэрыялаў справы, абвінавачаны на працягу амаль двух гадоў размяшчаў у вольным доступе пісьмовыя тэксты ўказанага зместу з выкарыстаннем уліковага запісу ў мэсэнджэры Telegram. У прыватнасці, даваў у іх станоўчую адзнаку рашэнняў і дзеянняў Адольфа Гітлера».

Пад увагу сілавікоў Аляксандр Рандарэнка трапіў пасля таго, як яго з сябрам «развялі на шчырасць» у відэа-чаце «Размовы з Палычам». Сёлета ў красавіку Аляксандр Рандарэнка і яго сябар Дзяніс Саўчанка былі прыцягнуты да адміністрацыйнай адказнасці за «прапаганду нацызму» (ч. 1 арт. 19.10 КоАП). У судзе Рандарэнка казаў, што падчас распівання спіртовых напояў, у стрыме з незнаёмым выказаў лозунг грамадска-палітычнага характару, пры гэтым прадэманстраваў вымпел з выявай сцяга Украіны жоўта-сіняга колеру.

Імя Дзяніса Саўчанкі больш у раскладах віцебскіх судоў не згадвалася. А вось Аляксандра Рандарэнку у судзе Першамайскага раёна Віцебска па адміністрацыйных справах з красавіка па чэрвень судзілі мінімум 5 разоў.

6 снежня блізкі да сілавікоў Тэлеграм-канал «Северная столица» напісаў, што "начался суд над врачом-нацистом", хаця на той момант афіцыйных звестак пра пачатак працэсу яшчэ не было. Таксама ў Тэлеграм-канале былі прадэманстраваны аператыўныя фотаздымкі, па якіх відаць, што падчас затрымання сёлета ў красавіку Аляксандра Рандарэнку моцна збілі.

Алег Бондараў