Судовае паседжаньне вяла судзьдзя Вераніка Барысава. Першапачаткова суд меўся адбыцца а 10-й гадзіне.
Як расказала Вольга Жураўская, яна хадайнічала аб пераносе паседжаньня на іншы дзень. Судзьдзя спачатку пагадзілася, але неўзабаве перадумала і прызначыла разбор на 16 гадзінаў. Прапанавала таксама правесьці суд праз Skyp, але блогерка адмовілася.
У якасьці сьведкі ў судзе выступіў супрацоўнік МУС Шчаглоў, які пацьвердзіў праўдзівасьць выкладзеных у пратаколе фактаў. Маўляў, блогерка, заявіўшы пра наяўнасьць у яе віруснай інфэкцыі, мела намер выклікаць у прысутных паніку. Пры гэтым яна без дазволу вяла відэафіксацыю таго, што адбывалася.
Выслухаўшы аргумэнты двух бакоў і з улікам таго, што Вольга мае двух непаўнагадовых дзяцей і знаходзіцца ў цяжкіх жыцьцёвых умовах, судзьдзя Вераніка Барысава аштрафавала блогерку на 30 базавых велічыняў (810 рублёў).
«Усё гэта робіцца з адной мэтай: закрыць мне рот. Аўдыторыя расьце, людзі пачынаюць думаць – значыць будуць і дзеяньні. У хуткім часе выбары, трэба зьбіраць сродкі, таму ціснуць на актыўных людзей, а я лічу, што блогеры – гэта актыўныя людзі», – пракамэнтавала рашэньне суду Вольга Жураўская.
С. Горкі