На гарадскім партале vitebsk.biz з'явіўся допіс пра ўражанні ад восеньскага кірамаша навучальных установаў вобласці, які традыцыйна праходзіць у першыя выходныя кастрычніка каля Лядовага палаца. "Мероприятие масштабное, очень много сельхозпродукции, ремесленники выставили свои изделия, мне очень понравилось. Одно «но»: очень травмоопасные ступеньки..."

Жыхары аддаленага віцебскага раёна Мішкава скардзяцца на непавагу з боку мясцовых уладаў: іх не задавальняе абсталяванне прыпынка грамадскага транспарта. Калі ідзе дождж, людзі хаваюцца не на прыпынку, а за ім, бо якраз насупраць – глыбокая лужына. І не ўсе кіроўцы здагадваюцца прытармазіць, каб не абліць патэнцыйных пасажыраў бруднай вадой.

У абласной газеце «Витебские вести» распавялі, што ў горадзе прайшла 3-я пазачарговая сесія рэгіянальнага аддзялення Рэспубліканскай партыі «Белая Русь». Той самай партыі, якую не перастаюць ухваляць улады і дзяржаўныя СМІ. Але ў згаданым артыкуле няма ні слова пра канкрэтную дзейнасць партыйцаў.

«Большасць, зразумела, тычыцца Віцебска. Але нямала павязана і з Воршай, Лёзнам, Полацкам і г. д., -- паведамляе актывіст. -- Ёсць прыклады даволі станоўчых вынікаў. Але ёсць і прыклады нерэагавання гадамі на нейкія праблемы. Прыходзілася рознымі высілкамі (зваротамі ва ўстановы вышэй) дамагацца жаданага».