Дзвюх віцяблянак судзяць за хрызантэмы ў руках
У мінулую суботу, 23-га студзеня, Ганну Каваленку і Алену Філіповіч затрымалі супрацоўнікі райаддзелу міліцыі Кастрычніцкага раёну. Як потым напісалі ў пратаколе, дзяўчаты «зладзілі шэсце ад дому №36 да дому №40 па вуліцы Леніна, трымаючы ў руках кветкі на знак пратэсту супраць зняволення палітвязняў», паведаміла Беларускае Радыё Рацыя.
Блогерку Алену Янушкоўскую кінулі за краты на 7 сутак
Суд Віцебскага раёну 29 студзеня прызнаў блогерку Алену Янушкоўскую вінаватай ва ўдзеле ў несанкцыянаваным пікетаванні (ч.3 арт. 23.34 КаАП) і пакараў яе адміністрацыйным арыштам на 7 сутак. Такое рашэнне прыняў суддзя Міхаіл Зубеня. Янушкоўская мае інваліднасць трэцяй групы, яна знаходзіцца за кратамі віцебскага ІЧУ ад 27 студзеня.
Суддзя Зубеня на слых вызначыў, што жанчына ўдзельнічала ў пікеце: штраф 1160 рублёў
28 студзеня ў судзе Віцебскага раёну прайшло слуханне адміністрацыйнай справы паводле ч.3 арт. 23.34 у дачыненні жыхаркі віцебскага раёну Юліі Ўласенкі. На прадэманстраваным відэафайле суддзя Міхаіл Зубеня апазнаў толькі голас жанчыны, але палічыў яе віну ва ўдзеле ў несанкцыянаваным пікетаванні даказанай. Аштрафаваў спадарыню Ўласенку на 40 базавых велічынь (1160 рублёў).
Студэнт Цімафей Журкевіч выйшаў на волю пасля 10 сутак арышту
Студэнт ВДТУ Цімафей Журкевіч, затрыманы 16 студзеня пасля ператрусу ў ягонай кватэры, 26 студзеня выйшаў на волю. Каля віцебскага СІЗА-2 яго сустракалі бацькі, сябры і паплечнікі. Трое сутак ён правёў у следчай камеры як падазраваны ў крымінальным злачынстве, 7 сутак – у камеры ізалятара часовага ўтрымання (ІЧУ), адбываючы пакаранне па адміністрацыйнай справе.
Студэнтак ВДМУ пакаралі за акцыю салідарнасці: Паліна Нітчанка – 10 сутак арышту, Анастасія Лявонцьева – штраф
Суд Кастрычніцкага раёну Віцебску 22 студзеня вынес рашэнне ў адміністрацыйнай справе паводле арт.23.34 КаАП у дачыненні да студэнтак 2-га курсу ВДМУ Паліны Нітчанкі і Анастасіі Лявонцьевай. Суддзя Уладзімір Царыкаў прызнаў удзел дзяўчат у не дазволеным уладамі пікетаванні даказаным і пакараў Паліну Нітчанку 10-цю суткамі арышту, Анастасію Лявонцьеву – штрафам у памеры 16 базавых велічынь.
7 сутак арышту – за паветраныя балонікі на акне ў Дуброўне
21 студзеня суд Дубровенскага раёну прысудзіў прадпрымальніку Міхаілу Чамураку 7 сутак адміністрацыйнага арышту паводле ч.3 арт. 23.34 КаАП. Бел-чырвона-белыя паветраныя балонікі, вывешаныя на акне прыватнага дому, суд палічыў публічным выказваннем грамадска-палітычных інтарэсаў. Актывіста ўзялі пад варту адразу пасля абвяшчэння прысуду.
Суддзя Царыкаў спыніў справу яшчэ трох удзельніц «пікету ў лесе», але прабачэння не папрасіў
Суд Кастрычніцкага раёну Віцебску 20 студзеня разгледзеў адміністрацыйныя справы ў дачыненні да Раісы Кухто, Людмілы Камінскай і Людмілы Валадкевіч, затрыманых 13 студзеня ў лесе за станцыяй «Лучоса» і абвінавачаных паводле арт. 23.34 КаАП. Суддзя Царыкаў не выявіў у матэрыялах справы сведчанняў датычнасці грамадзянак да правядзення несанкцыянаванага пікетавання ў Шпілеўскім лесе і справу спыніў.
Суд скасаваў справы дзвюх жанчын, затрыманых у Шпілеўскім лесе. Суддзя папрасіла прабачэння
19 студзеня суд Першамайскага раёну Віцебску вынес рашэнне ў справах Таццяны Севярынец і Алены Касновай, затрыманых разам з іншымі жанчынамі 13 студзеня ў лесе за станцыяй «Лучоса» і абвінавачаных паводле артыкулу 23.34 КаАП. Суддзя Барысава пастанавіла спыніць справу ў сувязі з недаказанасцю вінаватасці і прынесла афіцыйнае прабачэнне.
У Віцебску на 7 сутак арышту асудзілі студэнтку ВДМУ Паліну Нітчанка
У Віцебску 15 студзеня затрымалі студэнтку медычнага ўніверсітэту Паліну Нітчанка, паведамляе телеграм-канал «ВДМУ – разам». У суботу суд Чыгуначнага раёну Віцебску прысудзіў ёй 7 сутак адміністрацыйнага арышту за ўдзел у відэазвароце да ўладаў, запісаным яшчэ ў кастрычніку 2020 году, піша TUT.BY.
Пяць жанчын, якіх затрымалі за скандынаўскую хаду ў лесе, правядуць ноч у СІЗА
Ранкам 13 студзеня ў лесе за чыгуначнай станцыяй «Лучоса» пад Віцебскам былі затрыманыя 6 жанчын сталага веку, сярод іх – актывістка і маці палітвязня Таццяна Севярынец. Жанчыны меліся зладзіць шпацыр са скандынаўскімі палкамі, але былі дастаўленыя ў Першамайскі РАУС. Затрымлівалі іх 12 супрацоўнікаў МУС.