Пятніца, 29 Студзень 2021

Дзвюх віцяблянак судзяць за хрызантэмы ў руках

Ацаніць гэты матэрыял
(4 галасоў)
Алена Філіповіч (злева) і Ганна Каваленка Алена Філіповіч (злева) і Ганна Каваленка

У мінулую суботу, 23-га студзеня, Ганну Каваленку і Алену Філіповіч затрымалі супрацоўнікі райаддзелу міліцыі Кастрычніцкага раёну. Як потым напісалі ў пратаколе, дзяўчаты «зладзілі шэсце ад дому №36 да дому №40 па вуліцы Леніна, трымаючы ў руках кветкі на знак пратэсту супраць зняволення палітвязняў», паведаміла Беларускае Радыё Рацыя.

У Алены Філіповіч быў букет белых хрызантэм з адным чырвоным гваздзіком, у Ганны Каваленкі – толькі белыя хрызантэмы. За гэта на іх зладзілі аблаву, распавялі дзяўчаты: «На нас набеглі чалавек 10, з двух бакоў, звязалі нам рукі. Пыталіся ў нас : »Ну што, дабегаліся?» Ніхто з іх не прадставіўся, упіхнулі ў машыну, і ўсё».

«Спачатку нас павезлі ў РАУС для высвятлення асобаў. Сказалі, што высветляць і адпусцяць. Мы не супраціўляліся, добра, паедзем. Але потым трымалі 13 гадзін у боксе пасля высвятлення асобаў і завезлі ў ІЧУ», – расказалі віцяблянкі.

Пад вартай Ганна Каваленка і Алена Філіповіч правялі амаль двое сутак. У панядзелак, 25-га студзеня, суддзя Кастрычніцкага райсуду Уладзімір Царыкаў пачаў судзіць іх праз скайп. Ён пастанавіў дакументы накіраваць на дапрацоўку ў міліцыю, бо пратаколы былі складзены з памылкамі. Дзяўчат выпусцілі, перад тым забраўшы ў іх тэлефоны – маўляў, у заклад, што яны заплацяць прысуджаны штраф.

Працяг суду адбыўся 29-га студзеня, але выніку няма: суддзя другі раз накіраваў матэрыялы на дапрацоўку. Маёмасць дзяўчатам так і не вярнулі.