Удзельнікаў стрымаў блогера Сяргея Ціханоўскага, якія праходзілі на Віцебшчыне, абвінавацілі ў парушэньні заканадаўства пра масавыя мерапрыемствы. Суды праходзілі патаемна: сябрам і нават сваякам рэдка калі ўдавалася трапіць на працэсы, піша Беларускае Радыё Рацыя.

Віцяблянін Аляксандар Ільінец быў затрыманы міліцыянтамі 8 траўня. Пасьля складаньня пратаколу яго зьмясьцілі ў ізалятар часовага ўтрыманьня (ІЧУ), дзе ён правёў да суду трое сутак. Сёньня, 11 траўня, суд Чыгуначнага раёну Віцебску прызнаў яго вінаватым у парушэньні заканадаўства аб масавых мерапрыемствах (арт. 23.34 КаАП) і пакараў 5 суткамі адміністрацыйнага арышту з улікам ужо адбытых.