Словы гімну “Магутны Божа”, за сьпевы якога 27 ліпеня на траіх актывістаў завялі адміністрацыйныя справы, аўтар відэароліку замяніў на нецэнзурную лаянку. Зусім іншы зьмест набыў і відэаролік, зьняты на пікеце па зборы подпісаў за вылучэньне ў кандыдаты Тацяны Севярынец і Алены Шабуні каля гандлёвага цэнтру “Green”.

Актывісты прыгадваюць, што нешта падобнае ўжо здаралася і падчас ранейшых выбарчых кампаніяў.

“Убачыўшы відэа зь пікету каля крамы “Green”, мы спачатку толькі пасьмяяліся і вырашылі, што ня будзем зьвяртаць увагі на глупствы”, – адкамэнтавала наяўнасьць “кампрамату” ў сацыяльных сетках Тацяна Севярынец.

Але відэа, на якім актывісты сьпявалі гімн “Магутны Божа”, пераробленае на нецэнзурныя сьпевы, Алена Шабуня лічыць ужо ня глупствам, а абразай:

“Па-першае, мы вернікі, і гэта проста блюзьнерства, калі нехта дазваляе сабе такія рэчы! Па-другое, замест нашых сьпеваў гучаць такія адборныя мацюкі, што прыкра слухаць. Такое выкладваць у інтэрнэт проста немагчыма! У нас мусяць быць адказныя службы, якія ў стане вылічыць аўтара ці хаця б распаўсюднікаў, і загадаць выдаліць гэтую брыдоту! Па-трэцяе, у мяне шмат пытаньняў да таго, што гэта наогул за відэазапіс: з такіх ракурсаў нас здымалі толькі міліцыянты. І падчас збору подпісаў, і падчас сьпеваў. Атрымліваецца, ролік з брыдкай лаянкай змантажаваў той, хто мае доступ да міліцэйскага архіву відэазапісаў?”