Суддзя суда Наваполацка Зінаіда Балаболава 21 верасня за распаўсюджванне "экстрэмізму" ў сацыяльнай сетцы пастанавіла аштрафаваць на 1110 рублёў мясцовую жыхарку Ірыну Нікіціну.

Роўна праз тыдзень пасля таго, як 53-гадовага работніка “Нафтана” Іллю Двойрына прызналі вінаватым паводле ч. 1 арт. 339 Крымінальнага кодэкса (хуліганства) за аблітую белай фарбай машыну прарасейскага актывіста і пакаралі пазбаўленннем волі на адзін год умоўна, ён зноў апынуўся ў пастарунку, а потым у Цэнтры ізаляцыі правапарушальнікаў.

Суддзя суда Першамайскага раёна Віцебска Міхаіл Юрчанка 13 верасня за падпіску на "экстрэмісцкі" паблік пастанавіў аштрафаваць грамадзянку РФ Наталлю Куксёнак, якая жыве ў Віцебску. Гэта другая ў гэтым годзе адміністрацыйная справа, разгледжаная з нагоды распаўсюджвання “экстрэмізму” ў дачыненні да Куксёнак. Першая справа была разгледжана напрыканцы жніўня  тым жа суддём Юрчанка.

Суддзя суда Сенненскага Іна Досава 27 ліпеня за абразу следчага Сенненскага РАСК прыгаварыла мясцовага жыхара інваліда 2 групы Паўла Якубовіча да двух гадоў абмежавання волі без накіравання ва ўстанову адкрытага тыпу, да штрафу ў памеры 1850 рублёў і канфіскацыі камп'ютара.