Паводле матэрыялаў адміністрацыйнай справы, Якаўлеў на сваёй старонцы ў сацыяльнай сетцы «Аднакласнікі» меў спасылку на інтэрнэт-супольнасць з назвай «STOP LUKA», якую ўлады раней унеслі ў рэспубліканскі спіс экстрэмісцкіх матэрыялаў. Работнікі мясцовага аддзялення міліцыі сцвярджалі, што яны выявілі факт таго, што мужчына паставіў у раздзеле стужкі навін адзнаку-лайк «Клас» пад запісам экстрэмісцкай супольнасці «STOP LUKA», таксама выявілі падобныя адзнакі пад усімі запісамі дэструктыўнага характару.

У судовым паседжанні Аляксандр прызнаў сваю віну, не адмаўляў таго, што на яго старонцы ў сетцы «Аднакласнікі» з 2015 года мелася падобная інфармацыя, аднак, ён не меў на мэце распаўсюджваць экстрэмісцкія матэрыялы.

Суддзя Болоболова палічыла, што прызнанне віны "правапарушальнікам" з'яўляецца дастатковай умовай для таго, каб пакараць Якаўлева арыштам на 15 сутак у рамках ч.2 арт.19.11 КаАП. Пры гэтым суддзя абрала максімальны тэрмін знаходжання Якаўлева пад арыштам нягледзячы на ​​тое, што на ягоным утрыманні знаходзяцца малалетнія дзеці, што з'яўляецца змякчальным віну і пакаранне абставінамі.

Сяргей Носаў