"Аршанская газета" больш не сцвярджае, што ў яе гонар прыдумалі новы торт
Імаверна, прыслухаліся да крытыкі. Цяпер выданне піша пра торт "Оршанска.бай" вельмі сціпла: маўляў, ён "стал хитом продаж. Действительно вкусно и качественно. А главное, из натуральных ингредиентов". Адно што дэманструе выяву кавалачка торта побач з інфармацыяй пра падпіску на "раёнку".
Пад Віцебскам прадаецца былая рэзідэнцыя Лукашэнкі
Афіцыйная назва аб’екта на сайце Віцебскага цэнтра нерухомасці – “База адпачынку “Крупеніна””. Яе ўжо абвясцілі ў продаж, хаця кошт яшчэ не названы. База адпачынку месціцца за 30 км ад Віцебска на беразе возера Бораўна, гэта недалёка ад мяжы Віцебскага і Бешанковіцкага раёнаў. Яе збудавалі ў 2000 годзе, і якраз тут адпачываў Аляксандр Лукашэнка падчас візітаў на фестываль “Славянскі базар”.
Копію пратакола ператрусу не далі, бо там “таямніца асабістых дадзеных”
Такія тлумачэнні апошнім часам пачулі некалькі жыхароў Віцебшчыны. На патрабаванне пакінуць копію пратакола ператрусу і спіс забраных рэчаў ім адказалі, што там запісаны асабістыя дадзеныя сілавікоў. І перадача іх – гэта “парушэнне таямніцы асабістай інфармацыі”. Праўда, не зразумела, пра якую асабістую інфармацыю можа весціся, калі службовыя асобы дзейнічалі ў межах сваіх службовых паўнамоцтваў. Хатніх адрасоў тых, хто правідзіць ператрус, пратаколы не ўтрымліваюць – хіба толькі іх прозвішчы і пасады.
Віцебскі вядучы вяселляў распавёў пра палітычны данос
Пасля карпаратыўнай сустрэчы з калегамі нехта напісаў у чат-бот МУС пра тое, нібыта Віталь Савельеў дапускаў “абразлівыя выказванні палітычнага характару”. Праз дзве гадзіны па сканчэнні мерапрыемства да вядучага прыехаў нарад міліцыі па тлумачэнні.
Рэдактарка лёзненскай “раёнкі” прызнала, што ў газеце бракуе беларускай мовы
З Аленай Коласавай паразмаўляў блогер Андрэй Павук. Пытанні да рэдактаркі тычыліся асвятлення так званай “СВО” у беларускіх дзяржаўных СМІ, і таго, як асвятдяюцца падзеі Вялікай Айчыннай вайны. Пра тое, чаму зараз не прынята згадваць, што Аляксандр Лукашэнка прымаў прысягу як прэзідэнт пад бел-чырвона-белым сцягам, рэдактарка зазначыла “Мы пра такое не пішам”. А на заўвагу пра адсутнасці беларускамоўнага кантэнту адказала: “Это так. Нужно писать на родном языке. Мы будет стараться».