Удзельнікі сустрэчы абмяняліся думкамі аб стане правоў чалавека ў Віцебскай вобласьці. Швэдзкія дыпляматы цікавіліся, ці існуе дыялёг паміж праваабаронцамі і мясцовымі органамі ўлады ў справе абароны правоў і свабод грамадзян, наколькі разьвітая і сталая грамадзянская супольнасьць і што яна чакае ад будучай кампаніі па выбарах кіраўніка дзяржавы, а таксама – пра вяршэнства права і незалежнасьць судзьдзяў пры вынясеньні судовых рашэньняў.
Падчас размовы закраналіся тэмы, зьвязаныя з адміністрацыйнымі перасьледамі, пакараньнямі штрафамі і арыштамі блогераў ды грамадзянскіх актывістаў за асьвятленьне ў сацыяльных сетках і ўдзелу ў пікетах за незалежнасьць у Менску, Віцебску і Полацку, а таксама – журналістаў тэлеканалу «Белсат».
Асаблівую занепакоенасьць прысутныя выказалі ў сувязі з практыкай прымяненьня ў Беларусі артыкулу 328 КК (Незаконны абарот наркатычных сродкаў), умовамі, у якіх адбывае крымінальнае пакараньне палітвязень Міхаіл Жамчужны, магчымасьцю пагаршэньня сытуацыі з правамі чалавека ў краіне перад прэзыдэнцкімі выбарамі.
Са свайго боку праваабаронцы паведамілі пра парушэньні палітычных і грамадзянскіх правоў і свабод грамадзян у рэгіёне, пра мінулыя выбары ў нацыянальны парлямэнт і пра распачаты дыялёг з мясцовымі ўладамі.
Праваабаронца Павал Левінаў адзначыў пасьля сустрэчы шырокую інфармаванасьць прадстаўнікоў швэдзкага дыпкорпусу аб стане правоў чалавека ў Беларусі, глыбокае веданьне праблем і патрэбаў праваабаронцаў, шчырае жаданьне дапамагчы беларусам у развіцьці грамадзянскай супольнасьці і эканамічнага патэнцыялу краіны.
Завяршаючы сустрэчу, спадарыня амбасадарка Крысьціна Юханэсан адзначыла складанасць праваабарончай сытуацыі ў Беларусі і пажадала суразмоўцам посьпеху ў іх самаадданай працы ў справе абароны правоў і свабод беларускіх грамадзян.
Леанід Сьвецік, праваабаронца