Сярод ініцыятыў, што будуць падтрыманыя, да прыкладу, ёсць такая: стварэнне футбольнага клубу “Футбол на электравазках”. Атрымальнікам фінансавання пазначана віцебская грарадская арганізацыя “Беларускае таварыства інвалідаў”, але хто выступіў з такой ініцыятывай - не тлумачыцца.

Атрымальнікам фінансавання яшчэ двух праектаў стане камунальнае прадпрыемства “Аршанская спецаўтабаза”. Першы праект - стварэнне  памятнага знака ў гонар ліквідатараў наступстваў аварыі на ЧАЭС. Ніхто не ведае, як будзе выглядаць гэты знак і дзе яго плануе ўсталяваць таямнічая грамадская ініцыятыва.  Другі праект - яшчэ больш таямнічы: ён называецца “Выратуем парк” і мае быць рэалізаваным у вёсцы Казловічы Аршанскага раёна. Але ў раёне няма такой вёскі, і тым больш ніхто не чуў пра тамтэйшы парк, які вымагае выратавання. Але  на гэта будзе выдаткавана 18 тысяч рублёў з абласнога і рэспубліканскага бюджэтаў.

Не ўдалося знайсці дакладных звестак і пра крыніцу каля вёскі Заветнае Сенненскага раёна, якую плануюць добраўпарадкаваць за тыя ж 18 тысяч рублёў бюджэтных сродкаў. Дакладней, крыніца існуе, але ў якім яна знаходзіцца стане, і што плануецца зрабіць - нікому не кажуць. Затое ёсць звесткі, што каля гэтай вёскі актыўна ствараюць мемарыяльны аб’ект: селета каля брацкай магілы загінулых у Вялікай Айчыннай вайне высадзілі новую алею. А за вёскай пасадзілі 16, 5 тысяч саджанцаў бярозы і сасны.

Пытанні выклікае і незвычайны праект “Новае жыццё валуна “Вялікі камень”, на які выдаткуюць больш за 20 тысяч рублёў. На гэтыя грошы плануюць распрацаваць праграму віртуальнай рэальнасці і закупіць VR-акуляры. Ідэя цікавая, але не зразумела ні хто з’яўляецца ініцыятарам, ні хто будзе спажыўцом яе паспяховай рэалізацыі. Грошы атрымае аддзел культуры Шумілінскага раёна.

Ствараецца ўражанне, што за вялікай часткай праектаў-пераможцаў увогуле няма ніякай грамадскай ініцыятывы, тым болей, што грамадскі сектар на Віцебшчыне капітальна зачышчаны. І што з прапановамі найчасцей выступалі прадстаўнікі мясцовай улады.

Марыя Лісава