У Наваполацку «адкрылі» дзіцячы сад, які ў рэальнасьці не функцыянуе. На думку карыстальнікаў сацыяльных сетак, бацькоў маленькіх дзетак, якія літаральна засыпалі сваімі паведамленьнямі журналістаў, дзіцячы сад адкрыты не для наваполацкіх дзяцей, а асабіста для Натальлі Іванаўны Качанавай. 

Аляксандар Лукашэнка 2 красавіка падпісаў указы, якімі прызначыў новых кіраўнікоў УУС Менскага і Віцебскага аблвыканкамаў. Як паведамляе прэс-служба прэзыдэнта, генэрал-маёр міліцыі Віктар Сянько вызвалены ад пасады начальніка ўпраўленьня ўнутраных спраў Менскага аблвыканкаму і прызначаны начальнікам упраўленьня ўнутраных спраў Віцебскага аблвыканкаму. У сваю чаргу генэрал-маёр міліцыі Ігар Яўсееў вызвалены ад пасады начальніка ўпраўленьня ўнутраных спраў Віцебскага аблвыканкаму і прызначаны начальнікам упраўленьня ўнутраных спраў Менскага аблвыканкаму.

У Віцебскай вобласьці для аховы межаў недастаткова эфэктыўна задзейнічаюцца добраахвотныя дружыны зь ліку мясцовага насельніцтва. Такое меркаваньне выказаў старшыня Дзяржпагранкамітэту Беларусі Леанід Мальцаў на паседжаньні камісіі Віцебскай вобласьці па рэалізацыі дзяржаўнай памежнай палітыкі.

Упраўленьнем Сьледчага камітэту па Віцебскай вобласьці расьсьледуецца справа ў дачыненьні да начальніка Віцебскай абласной інспэкцыі рэспубліканскай установы “Дзяржаўная хлебная інспэкцыя” на падставе артыкулу 430 КК (атрыманьне хабару).