Праект Анжалікі Андрэевай увасабляецца адразу на шэрагу інтэрнэт-пляцовак - на Youtube, у Telegram, TikTok і ў  “ВКонтакте”.  Вялікай папулярнасці не відаць. Прынамсі, Telegram- канал мае ўсяго 77 падпісчыкаў.

Затое блогерку актыўна падтрымліваюць праўладныя рэсурсы - відэаблог ужо разрэкламавалі інтэрнэт-рэсурсы шэрагу “раёнак”, віцебскіх абласной і гарадской газет, блізкі да сілавікоў  Telegram- канал “Вишнёвая сгущенка” і Telegram- каналы Віцебскага аблвыканкама і Аршанскага райвыканкама.

Анжаліка Андрэева - ураджэнка Оршы. Упершыню ў якасці “вядомай” блогеркі яе прадставілі ў газеце “Беларусь сегодня”, калі увосень 2024 г. яна ўсхваляла “Марафон адзінства”. «Марафон единства» —  это доказательство того, что белорусы формируют собственную политическую культуру, сохраняют историческое прошлое, пишут будущее. Предприятия в стране работают, несмотря на санкции. Обязательно расскажу о своих впечатлениях подписчикам. Приятно будет увидеть и реакцию беглых, которые утверждают, что Беларусь «отстает», — працытавала словы Андрэевай “СБ”. 

 Telegram- канал  “Витебск я гуляю/ Новости Витебска” высветліў, што Анжаліка Андрэева ў 2019 годзе скончыла Аршанскі механіка-эканамічны каледж і што ў сваіх сацсетках  “ проявляет интерес к российской политике — подписана на паблик «Путин — лидер».

Падобны праект, дзе вядучы не шкадуе абразаў на адрас суседніх еўрапейскіх краін, у Віцебскай вобласці ўжо ёсць. Гэта відэаблог  галоўнага спецыяліста ідэалагічнай работы і па справах моладзі Віцебскага аблвыканкама Святаслава Міхайлава, які пачынаўся як самастойны  відэапраект пад няўцямнай назвай “Свята место” , а потым стаў “ведамасным” - цяпер пад назвай  “Вести не молчат” ён выходзіць на Youtube-канале абласной газеты “Витебские вести”.

Аляксандр Падзвінскі