7 лютага ў раскладзе суда Першамайскага раёна ў'явілася імя і прозвішча Георгія Каржанеўскага, журналіста і культуролага, які рабіў агляды мастацкіх падзей для розных рэгіянальных выданняў. Яго вінавацілі ў «распаўсюдзе экстрэмізму» і «прапагандзе нацысцкай сімволікі».

6 і 7 лютага ў судзе Кастрычніцкага раёна Віцебска па палітычна матываваных «адміністратыўках» судзілі студэнтаў. Верагодна, пратаколы за «распаўсюд экстрэмізму» ў інтэрнэце – гэта вынік праверак тэлефонаў, якія апошнім часам ладзяцца ў навучальных установах абласнога цэнтра.

4 лютага ў судзе Кастрычніцкага раёна Віцебска за «распаўсюд экстрэмізму» судзяць 64-гадовую мясцовую актывістку. Адміністратыўную справу, распачатую супраць Надзеі Куканос паводле ч.2 арт. 19.11 КаАП разбірае суддзя Ганна Кот. Гэтую неабыякавую жанчыну многія віцябляне памятаюць па ранейшых падзеях: яна заўсёды востра рэагавала на несправядлівасць, і таму не бянтэжылася скардзіцца на парушэнні ў дзейнасці дзяржаўных структур і кіраўнікоў любога рангу.

Судовы працэс прайшоў 3-га лютага ў судзе Шаркоўшчынскага раёна. Адміністрацыйны пратакол, складзены на Андрэя Буку паводле ч.3 арт. 24.23 КаАП, разглядала суддзя Аксана Табола. Прымяненне ч. 3 азначае, што падсудны цягам года здзейсніў падобнае правапарушэнне паўторна.