Аўторак, 18 Ліпень 2017

Прадпрымальніку вярнулі пляншэт. Але справу пра абразу прэзыдэнта не закрылі

Ацаніць гэты матэрыял
(0 галасоў)
Генадзь Бердзянёў Генадзь Бердзянёў

Працягваецца сьледзтва па справе пра абразу прэзыдэнта полацкім прадпрымальнікам Генадзем Бердзянёвым. 10 ліпеня сьледчы вярнуў прадпрымальніку яго электронны пляншэт, які канфіскавалі для экспэртызы падчас ператрусу на кватэры 24 красавіка 2017 году.

Лінгвістычная экспэртыза камэнтароў, якія зрабіў полацкі прадпрымальнік у сацыяльнай сетцы «Одноклассники», праводзілася на працягу двух з паловай месяцаў у Віцебску.

Справа супраць Генадзя Бердзянёва была распачатая пасьля заявы іншага прадпрымальніка, Кавалёва Сяргея з Наваполацку, зь якім у Генадзя здарылася сварка ў камэнтарах сацыяльнай сеткі.

Дзеля сваёй абароны Бердзянёў у чэрвені напісаў сустрэчную заяву ў Сьледчы камітэт аб прыцягненьні Кавалёва па тым самым артыкуле Крымінальнага кодэксу. Але сьледзтва не знайшло ў камэнтарах Кавалёва падставаў да распачынаньня крымінальнай справы.

Генадзь Бердзянёў працягвае працаваць на Полацкім рынку, карыстаецца павагай калегаў па бізнэсе. Да яго, як да грамадзкага актывіста, пастаянна зьвяртаюцца калегі - індывідуальныя прадпрымальнікі па параду дзеля абароны сваіх інтарэсаў.

Аляксандар Марозаў

Пакінуць камэнтар