Суд Віцебскага раёну прызнаў 41-гадовага Сяргея Іванова вінаватым у прывядзенні ў непрыдатны стан сродкаў чыгуначнага транспарту, шляхоў спалучэння, сродкаў сігналізацыі (ч.1 арт. 309 КК) ды ў замаху на такія дзеянні (ч.1 арт. 14 КК) і пакараў яго пазбаўленнем волі на тры гады. 

Суд Глыбоцкага раёну 12 кастрычніка агучыў вырак 19-гадоваму вайскоўцу тэрміновай службы Аляксандру Караткевічу, які на пачатку красавіка 2021 году на службовым грузавіку з'ехаў з вучэбнага палігону ў Берасцейскай вобласці, каб наведаць маці на Віцебшчыне. Меў пры сабе аўтамат. Суд прызнаў яго вінаватым адразу па пяці артыкулах Крымінальнага кодэксу і прысудзіў да 7 гадоў пазбаўлення волі ў калоніі ўзмоцненага рэжыму.

У Віцебскім абласным судзе 11 кастрычніка разглядалася скарга намесніка першаснай арганізацыі Беларускага незалежнага прафсаюзу (БНП) працаўнікоў ААТ «Нафтан» Аляксандра Балонкіна, якога 1 кастрычніка наваполацкі суд пакараў 15 суткамі адміністрацыйнага арышту. Балонкін быў прызнаны вінаватым у распаўсюдзе экстрэмісцкіх матэрыялаў (арт. 19.11 КаАП), бо нібыта размясціў у Instagram фота з плакатам «Я / МЫ ТУТ.бай».

Пятнаццаць сутак адміністрацыйнага арышту прысудзілі 8 кастрычніка ў судзе Полацкага раёну і гораду Полацку выкладчыцы вакальнай студыі ў мясцовым цэнтры культуры Ірыне Гражэўскай. Яе прызналі вінаватай у распаўсюдзе экстрэмісцкіх матэрыялаў (ч.2 арт. 19.11 КаАП). Нібыта жанчына зрабіла рэпост навіны TUT.BY у сацсетцы «ВКонтакте». Пастанову аб арышце выкладчыцы вынес суддзя Андрэй Дзергачоў.