30 траўня Аляксандар Ільінец падышоў да зборшчыкаў подпісаў за Сьвятлану Ціханоўскую і пастаяў каля пікету каля 12 хвілінаў. Гэтага аказалася дастатковым, каб – з другой спробы! – абвінаваціць актывіста ва ўдзеле ў несанкцыянаваным пікеце.
Парадокс, але 1 чэрвеня, калі праходзіў першы суд над удзельнікамі пікетаваньня, судзьдзя Алена Цыганкова ў дзеяньнях Ільінца незаконных дзеяньняў ня ўбачыла ды накіравала ягонаю справу на дапрацоўку. Ніякіх прамоваў ці публічных зваротаў на пікеце ніхто не рабіў, але гэтым разам для абвінавачваньня дастатковым аказалася намінальная прысутнасьць актывіста ля плякатаў з выявамі і надпісамі.
«40 базавых за тое, што я падышоў да сваіх знаёмых, каб паразмаўляць! Гэты факт сьведчыць пра тое, што яны хочуць яшчэ да выбараў загнаць пад плінтус усіх больш-менш актыўных людзей», – кажа Аляксандар Ильінец.
За сваю актыўнасьць Ільінец ужо адседзеў 5 сутак адміністрацыйнага арышту, а агульная сума штрафаў, прысуджаных яму ад пачатку электаральнай кампаніі, складае ўжо 1755 рублёў (65 базавых велічынь).
С. Горкі
Камэнтуйце гэтую навіну на нашай старонцы ў facebook!