Зьміцер Лупач спрабаваў аспрэчыць рашэньне суду Глыбоцкага раёну ад 11 траўня. Паводле ч.1 арт. 23.34 КаАП (парушэньне заканадаўства аб масавых мерапрыемствах), суд аштрафаваў журналіста на 10 базавых велічыняў, а паводле ч.2 арт.22.9 (незаконны выраб і (або) распаўсюд прадукцыі СМІ) прысудзіў 45 базавых велічыняў (1215 рублёў). Таксама журналіст быў арыштаваны на 10 сутак.
Глыбоцкім судом Лупач быў прызнаны вінаватым у тым, што 31 сакавіка, знаходзячыся на цэнтральнай плошчы Глыбокага, узяў удзел у незаконным пікетаваньні, падчас якога нібыта выказаў для ютуб-каналу «Страна для жизни» сваё стаўленьне да дзейнай улады. Яго таксама зьвінавацілі ў тым, што без акрэдытацыі ў якасьці карэспандэнта замежнага СМІ у красавіку (дакладная дата ня вызначаная) узяў інтэрвію, якое пазьней было разьмешчанае на тэлеканале «Белсат».
З пастановай суду журналіст не пагадзіўся. У скарзе зьвярнуў увагу на парушэньні Канстытуцыі і Міжнароднага пакту аб грамадзянскіх і палітычных правах. Указаў на працэсуальныя парушэньні і права на абарону.
Зьміцер Лупач прасіў адмяніць пастанову ў сувязі з адсутнасьцю ў ягоных дзеяньнях складу адміністрацыйнага правапарушэньня.
Таксама ў скарзе журналіст хадайнічаў, каб яго прывезьлі ў Віцебск для ўдзелу ў судовым паседжаньні, але гэтую просьбу суд праігнараваў. Дарэчы, як і астатнія факты, выкладзеныя ў скарзе.
Судзьдзя Сьвятлана Іванова пакінула пастанову Глыбоцкага суду бязь зьменаў, а скаргу без задавальненьня.
«Арышт Зьмітра Лупача і іншых актыўных людзей – гэта зачыстка, запалохваньне перад выбарчай кампаніяй. Улада разумее, што праз сацыяльныя, эканамічныя і палітычныя праблемы незадаволенасьць насельніцтва расьце. Гэткімі захадамі яна намагаецца не дапусьціць ніякай бескантрольнай актыўнасьці людзей, а таксама перашкаджае распаўсюду альтэрнатыўнай інфармацыі», – кажа віцебскі праваабаронца Павал Левінаў.
Сёньня ўвечары мусіць скончыцца 10-дзённы тэрмін адміністрацыйнага арышту Зьмітра Лупача – ён мае выйсьці на волю.
С. Горкі
Камэнтуйце гэтую навіну на нашай старонцы ў facebook!