Пасьля ўступленьня судовай пастановы ў законную сілу антыкрызысны кіраўнік павінен распачаць пагашэньне заяўленых патрабаваньняў конкурсных крэдытораў на суму больш за 10,4 мільёну рублёў, у тым ліку па плацяжох у бюджэт на суму амаль 7 мільёнаў рублёў за кошт продажу маёмасьці банкрута.
Сход крэдытораў устрымалася ад зацьвярджэньня пляну ліквідацыі і ня даў папярэдняй згоды на заключэньне міравога пагадненьня. Пры гэтым плян санацыi даўжнiка, узгоднены сходам крэдытораў, у тым ліку яго дапрацаваны варыянт, прызнаны неабгрунтаваным па выніках экспэртызы, праведзенай на даручэньне суду РУП «Белсудэкспэртзабесьпячэньне».
Акрамя таго, за пэрыяд знаходжаньня ў працэдуры эканамічнай неплацежаздольнасьці плацежаздольнасьць прадпрыемства пагоршылася. Выручка ад рэалізацыі прадукцыі за студзень-сакавік 2017 году зьнізілася на 14,8% у параўнаньні з аналягічным пэрыядам 2016 году. Забавязаньні вінзаводу павялічыліся на 12% і склалі 11,17 мільёну рублёў, у тым ліку па аплаце працы арганізацыя завінавацілася 45 тысяч рублёў, пры гэтым кошт яго актываў узрос толькі на 7,3% амаль да 7 мільёнаў. Сума назапашаных даўгоў у 1,6 разы перавышае кошт яго маёмасьці.
Прадпрыемству спатрэбіцца на працягу двух гадоў накіроўваць выручку ад рэалізацыі прадукцыі выключна на пагашэньне запазычанасьці. Пры такіх паказчыках плацежаздольнасьці не бачыцца магчымасьці вінзаводу разьлічыцца па сваіх забавязаньнях.
«З улікам заключэньня экспэрта, на падставе матэрыялаў справы суд прыйшоў да высновы пра адсутнасьць дастатковых падставаў меркаваць, што плацежаздольнасьць даўжнiка можа быць адноўленая, і прыняў рашэньне пра адкрыцьцё лiквiдацыйнага вядзеньня тэрмінам на адзін год», – патлумачыла Вольга Тур.
Абавязкі па ліквідацыі даўжніка ускладзеныя на антыкрызыснага кіраўніка Ўладзімера Пашко.
Вытворчасьць па справе пра эканамічную неплацежаздольнасьць (банкруцтва) КУВП «Полацкі вінаробны завод» распачатая ў траўні 2016 году з ініцыятывы самога даўжніка.
Прадпрыемства ўтворанае ў 1929 годзе і спэцыялізуецца на вытворчасьці пладова-ягадных вінаў. Сьпісачная колькасьць работнікаў складае 103 чалавекі (паводле дадзеных на 1 студзеня 2017 году).