“З гарвыканкаму прыйшоў адказ на нашу заяўку. Напісана, што нам адмовілі, бо мы просім дазволу на шэсьце і мітынг у недазволеных месцах, і правядзеньне там нашых акцыяў будзе парушэньнем заканадаўства. Насамрэч парушаем заканадаўства ня мы”, - гаворыць сябра КХП БНФ Ян Дзяржаўцаў.

Віцебскі ўрач Ігар Пастноў неаднаразова ўздымаў балючыя пытаньні віцебскай мэдыцыны ў друкаваных СМІ і праз інтэрнэт. Цяпер ён мусіў зьвярнуцца ў міліцыю, бо нехта, падпісваючыся ягоным імем, разьмяшчае ў інтэрнэце камэнтары правакацыйнага зьместу. Заява Ігара Пастнова пра тое, што невядомыя ад яго імя “абліваюць брудам знаёмых і сяброў”, зафіксаваная ў адмысловым відэазвароце. Ен гаворыць пра тое, што заўжды імкнуўся абнародаваць тыя праблемы, якія мае віцебская мэдыцына, але не “зьбіраць бруд”. Калі ж міліцыя не паставіцца да ягоных патрабаваньняў знайсьці сапраўдных паклёпнікаў сур’ёзна, віцебскі лекар будзе зьвяртацца ў пракуратуру.

Дзесяць сем’яў выселеныя за неаплату жыльлёва-камунальных паслуг у студзені-верасьні ў Віцебскай вобласьці, паведаміла начальніца аддзелу бухуліку і справаздачнасьці ўпраўленьня жыльлёва-камунальнай гаспадаркі Віцебскага аблвыканкаму Натальля Яцук. Адключаныя камунальныя паслугі (вада, электрычнасьць і газ) 4,2 тысячам сем’яў. Папярэджаньні дасланыя 23,7 тыс. неплацельшчыкам. Пададзена 3,9 тыс. выканаўчых надпісаў на суму больш як Br2 млрд., зь іх выканана больш за 2 тыс. на Br1, 2 млрд. У суд пададзена 778 пазоўных заяў на спагнаньне даўгоў на Br500 млн., зь іх задаволена 550 на Br300 млн.

З-за аднаго пропуску ад навучэнца мэдкаледжу патрабуюць забраць дакумэнты. Сяргей Семенчукоў - брат актывісткі грамадзянскай кампаніі «Эўрапейская Беларусь» Алены Семенчуковай.