Група «Навіны Віцебска» мае 25,6 тысяч падпісчыкаў – гэта самы масавы віцебскі паблік. У ім публікаваліся гарадскія навіны – рэрайты матэрыялаў з іншых СМІ, рэпартажы і аўтарскія праекты самой Таццяны Мацвеевай. Журналістка займалася гэтым бескаштоўна – з любові да прафесіі і да горада, у якім жыве.

«У мяне па-ранейшаму ёсць жаданне рабіць для вас навіны. Ёсць і творчыя ідэі. Засталіся і чарнавікі, распачатыя, але недапісаныя тэксты. Аднак групу давядзецца закрыць. На які час, я не ведаю. Пакуль раблю гэта на месяц, - напісала Таццяна Мацвеева. -- Зараз мне вельмі балюча і крыўдна, што гэту справу мне давядзецца спыніць. Але надзея памірае апошняй. І я веру, што мы яшчэ сустэнемся».

Адміністратарка групы «Навіны Віцебска» паведаміла пра закрыццё пабліка на наступны дзень пасля таго, як перастаў адчыняцца сайт «Народныя Навіны Віцебска». Гэты інфармацыйны рэсурс быў заснаваны ў 2008 годзе, але сёлета 13 студзеня стала вядома, што яго прызналі «экстрэмісцкай інфармацыйный прадукцыяй». Адпаведнае рашэнне 10 студзеня прыняў суд Кастрычніцкага раёна Віцебска. Цяпер сайт і яго сацсеткі не адчыняюцца.

Алег Бараноўскі