Сустрэча адбылася з ініцыятывы спадара Ооствэйна ў офісе пяршоўкі Свабоднага прафсаюзу работнікаў ААТ «Полацак-Шкловалакно».

«Беларусь актыўна гандлюе з нашай краінай. Гэта добра, але ў нас вельмі мала ведаюць пра Беларусь, таму нас таксама цікавіць сытуацыя з правамі чалавека і выкананьне правоў прафсаюзаў», – растлумачыў прадстаўнік Каралеўства.

Актывісты падзяліліся са спадаром Ооствэйнам расповедамі пра гісторыю незалежнага прафсаюзнага руху ў рэгіёне, расказалі пра стаўленьне адміністрацыі прадпрыемства і мясцовых уладаў да пяршоўкі і чальцоў Свабоднага прафсаюзу. Апячатаныя адміністрацыяй прадпрыемства электравыключальнікі і разэткі ў офісе надзвычай выразна пацьвердзілі сказанае.

Працаваць Свабоднаму прафсаюзу ў Полацку даводзіцца ў цяжкіх варунках. Сьведчаньнем парушэньня права на аб'яднаньне ў прафсаюзы ёсьць такія падзеі апошніх двух гадоў:

• Забарона на правядзеньне масавых мерапрыемстваў прафсаюзу
• Штрафы прафсаюзным актывістам за прафсаюзную дзейнасьць
• Ператрус у офісе Свабоднага прафсаюза рабочых заводу «Полацак-Шкловалакно»
• Затрыманьні прафсаюзных актывістаў са зьмяшчэньнем старшыні ў ІЧУ на трое сутак
• Паклёп і абразы прафсаюзных актывістаў у сацыяльных сетках
• Забарона на пералічэньне прафсаюзных унёскаў рабочымі заводу
• Арышт банкаўскага рахунку прафсаюзу і арышт маёмасьці прафсаюзу
• Адмова працадаўцы ад калектыўных перамоваў з прафсаюзам
• Забарона на наведваньне прадпрыемства прафсаюзнымі прадстаўнікамі.

«Мы будзем рады, калі ў Галяндыі даведваюцца пра Беларусь больш», – заявілі пасьля сустрэчы прафсаюзныя актывісты.

Спадар Паўл ван Oоствэйн паабяцаў праінфармаваць ўрад сваёй краіны пра пачутае.

У гэты самы дзень у часовага паверанага Нідэрляндаў у Беларусі ўжо адбыліся сустрэчы з кіраўніцтвам ААТ «Нафтан» і кіраўніцтвам Наваполацкага гарвыканкаму ды Полацкага ўнівэрсытэту.

Аляксандaр Марозаў