Аляксандар Мацяюк быў затрыманы міліцыяй ранкам 21 траўня на выхадзе з пад’езду дома, у якім жыве. Паводле нашай інфармацыі, днём раней яму спрабавалі ўручыць позву ў Чыгуначны РАУС, але ён адмовіўся яе браць. У міліцыю ён не паехаў, але зьбіраўся наведаць дачу.
Пасьля затрыманьня яго адразу адвезьлі ў ізалятар часовага затрыманьня (ІЧУ).
Судовае паседжаньне прайшло ў анлайн-рэжыме (праз скайп). Мацеюка абвінавацілі ва ўдзеле ў стрыме Ціханоўскага, які прайшоў у Віцебску 30 красавіка. Праваахоўнікі расцанілі тую сустрэчу як несанкцыянаванае пікетаваньне. Знаходзячыся ў ІЧУ, Аляксандар Мацяюк хадайнічаў, каб яму далі час на заключэньне дамовы з адвакатам, які знаходзіцца ў Менску. Хадайніцтва задаволілі, але далі на гэта толькі гадзіну перапынку ў судовым паседжаньні.
Па словах віцебскага актывіста Паўла Шаўчэнкі, які трапіў на суд у якасьці слухача, пасьля перапынку Мацяюк зноў хадайнічаў аб адвакаце, на што судзьдзя Алена Грабянчук заявіла: «Ужо позна, паседжаньне пачалося!». Паводле назіраньняў Шаўчэнкі, гэтыя словы судзьдзі не былі занесеныя ў пратакол.
Судзьдзя Грабянчук прызнала Аляксандра Мацеюка вінаватым ва ўдзеле ў несанкцыянаваным пікетаваньні (арт. 23.34) і пакарала адміністрацыйным арыштам на 4-ра сутак.
Аляксандар Мацяюк будзе знаходзіцца за кратамі да 25 траўня.
Зьміцер Міраш
Камэнтуйце гэтую навіну на нашай старонцы ў facebook!