На пагорку, разьмешчаным на правым беразе ракі Лучоса каля вёсак Шапуры і Сялюты Віцебскага раёну, гарадзішча знайшлі ў 1956 годзе. Побач, на заходнім схіле пагорку, знаходзіцца датаванае I тысячагодзьдзем да н.э. селішча, якое таксама аб’яўленае культурна-гістарычнай каштоўнасьцю Беларусі 3-й катэгорыі.

У выніку земляных работ значную частку пагорку раскапалі, другая яго частка засыпаная адваламі вынятага грунту. Пры гэтым былі ўскрытыя пахаваньні, якія знаходзіліся тут, а косьці ў беспарадку параскіданыя па навакольнай тэрыторыі. Пры беглым аглядзе ўдалося разгледзець тры цэлыя чалавечыя чарапы, а таксама фрагмэнты яшчэ некалькіх, сьцегнавыя і галёначныя косьці, рэбры і фрагмэнты тазу. Таксама чалавечыя парэшткі бачныя на зрэзе пагорку.

Гарадзішча і селішча каля вёскі Шапуры ўнесеныя ў Праграму захаваньня гісторыка-культурнай спадчыны Віцебскага раёну на 2012—2015 гады, прынятую Віцебскім райсаветам 7 чэрвеня 2012 году. Вясной, паводле слоў мясцовых жыхароў, тут была ўсталяваная ахоўная дошка, што, зрэшты, не перашкодзіла разбурыць археалягічны помнік.

Крыніца: БелСат