Аўторак, 04 Верасень 2018

Праваабаронцы б’юць трывогу: у віцебскім Верхнім замку зьнішчаецца культурны слой

Ацаніць гэты матэрыял
(2 галасоў)
Рэканструкцыя цеплатрасы на вул. Пушкіна ў Віцебску Рэканструкцыя цеплатрасы на вул. Пушкіна ў Віцебску

У гістарычнай частцы Віцебску (Верхні замак) ад жніўня вядуцца працы па рэканструкцыі цеплатрасы. Экскаватарамі былі адкапаныя і выкінутыя на паверхню часткі драўляных канструкцый – цалкам магчыма, што маставой XIV стагодзьдзя. Пацьвердзіць здагадку ў археолягаў пакуль не атрымалася. Але праваабаронцы б’юць трывогу.

“На маю думку, будаўнікі, якія праводзяць рамонт цеплатрасы на вуліцы Пушкіна ў Віцебску, пашкодзілі культурны слой у той частцы гораду, якая мае статус ахоўванай дзяржавай гісторыка-культурнай каштоўнасьці. Калі гэта сапраўды так, то такія дзеяньні падпадаюць пад крымінальны перасьлед вінаватых асобаў”, – мяркуе віцебскі праваабаронца Леанід Сьвецік.

Працы вядуцца на вуліцы Пушкіна ў Віцебску. каля тэатру імя Якуба Коласа

Тое, што зараз адбываецца на тэрыторыі Верхняга замку ў Віцебску, ён называе вандалізмам і патрабуе, каб пракуратура спыніла працы ў гістарычнай частцы гораду.

“Лічу, што дзяржаўныя органы мусяць зрабіць неадкладныя захады, каб спыніць вандалізм. У прыватнасьці – каб пракуратура гораду Віцебску прыпыніла рамонтныя працы і пры дапамозе археолягаў ацаніла шкоду, якую прычынілі будаўнікі ў гістарычнай частцы Віцебску.

У выпадку, калі факт зьнішчэньня альбо пашкоджаньня гісторыка-культурнай каштоўнасьці будзе ўстаноўлены – прыцягнуць іх да адказнасьці згодна зь дзейным заканадаўствам”, – гаворыць Леанід Сьвецік.

Рэшткі драўніны, вырытыя экскаватарам на тэрыторыі Верхняга замку ў Віцебску 

На жаль, “Віцебскай вясьне” пакуль што не ўдалося атрымаць камэнтар і ацэнку незалежных адмыслоўцаў-археолягаў, а галоўны спэцыяліст Андрэй Бялецкі, які курыруе ў гарвыканкаме пытаньні аховы гісторыка-культурнай спадчыны, знаходзіцца ў адпачынку.

Зьміцер Міраш, фота аўтара

Залагініцца каб дадаць камэнтары