Цяпер ён там у якасьці пацыента, а да таго працаваў лекарам-псыхіятрам. У 2-е закрытае аддзяленьне яго забралі 16 жніўня проста з працы. Здарылася гэта неўзабаве пасьля зьяўленьня ў інтэрнэце чарговага ягонага звароту да землякоў, дзе ён ужо ня першы раз скрытыкаваў стан і дзейнасьць віцебскіх мэдычных установаў. Ігар Пасноў апавёў таксама пра тое, што кіраўніцтва псыхіятрычнага шпіталя вінаваціць яго ў «неэтычных паводзінах» за вострую крытыку і што яму пагражаюць прымусовым псыхіятрычным лекаваньнем.

Сайт «Народныя Навіны Віцебску» апублікаваў некалькі дакумэнтаў, якія трапілі да журналістаў з псыхіятрычнага шпіталю. Паводле заключэньня ўрачэбна-кансультацыйнай камісіі, у Пастнова былі выяўленыя «наяўнасьць звышкаштоўных і вар’яцкіх ідэяў адносінаў і перасьледу, пастаяннае завышэньне сваёй значнасьці, што вядзе да пагаршэньня сацыяльнага функцыянаваньня і пагаршэньня прадукцыйнасьці яго камунікацыяў». Гэткія высновы былі зробленыя ў тым ліку на падставе паказаньняў супрацоўнікаў цэнтру і публікацыяў у інтэрнэце, зробленых доктарам Пастновым.

Згодна з наяўнымі дадзенымі, з 22 ліпеня да Ігара Пастнова пачалі ўжываць лячэбныя працэдуры.

Паводле Радыё Свабода і Народных Навін Віцебска