Да асобы Ўладзімера Шломы ў жыхароў Віцебску ўвага асаблівая. Напрыклад, ён быў удзельнікам гучных падзеяў вакол звальненьня з працы настаўніцы вышэйшай катэгорыі, маці былога палітвязьня, віцебскай актывісткі Тацьцяны Севярынец. Тады, у 2007 годзе, Уладзімер Шлома працаваў загадчыкам Першамайскага раённага аддзелу адукацыі. Паводле зьвестак сайту «Народныя навіны Віцебска», на працы ў гэтым райаддзеле спадар Шлома аказаўся, нават ня скончыўшы ВНУ. А неўзабаве пасьля звальненьня Тацьцяны Севярынец ён атрымаў падвышэньне – яго перавялі працаваць начальнікам гарадзкога аддзелу адукацыі.
У 2011 годзе Ўладзімер Шлома атрымаў новае прызначэньне – стаў намесьнікам старшыні гарвыканкаму, курыраваў аддзелы адукацыі, спорту і турызму, ідэалягічнай работы, культуры і па справах моладзі, камісію па справах непаўнагадовых, упраўленьне па працы, занятасьці і сацыяльнай абароне.
У гэтай якасьці ён запомніўся многім віцебскім актывістам, бо неаднаразова забараняў правядзеньне масавых акцыяў. З гэтай нагоды мясцовыя прадстаўнікі апазыцыі спрабавалі судзіцца, але ў суд Уладзімер Шлома не зьяўляўся, спасылаючыся на занятасьць. А забароны праводзіць акцыі аргумэнтаваў рашэньнем віцебскага гарвыканкаму, паводле якога заяўнікі мусяць загадзя прадстаўляць органу мясцовай улады дамовы на абслугоўваньне акцыяў. Заключыць такія дамовы ні з мэдыкамі, ні зь міліцыяй аказвалася немагчымым, а зьмяніць гэты пункт рашэньня гарвыканкаму чыноўнікі, і ў прыватнасьці, спадар Шлома, катэгарычна адмаўляліся.
Прасьцей кажучы, спадар Шлома асабіста спрычыніўся да таго, што з 2008 году ў Віцебску не было дазволена ніводнага масавага мерапрыемства з ініцыятывы дэмакратычных актывістаў.
На пасадзе намесьніка старшыні гарвыканкаму Ўладзімер Шлома працягваў публічна канфліктаваць з актывісткай Тацьцянай Севярынец. У прыватнасьці, дазваляў сабе некарэктныя выказваньні падчас абмеркаваньня праблемы будаўніцтва паліклінікі ў віцебскім мікрараёне «Білева», узьнятай каардынатаркай аргкамітэту па стварэньні партыі БХД.
Нейкі час таму ў Віцебску зьявілася інфармацыя, што Ўладзімера Шлому адправілі ў адстаўку. Аднак афіцыйнага пацьверджаньня гэтаму няма – найперш таму, што гарадзкія ўлады чамусьці ня лічаць патрэбным інфармаваць гараджан пра зьмены ў складзе кіраўніцтва гораду. І пра тое, што такія зьмены ёсьць, сьведчыць толькі сайт гарвыканкаму: на ім больш няма згадак пра спадара Шлому ў якасьці намесьніка старшыні, і адсутнасьць фотаздымку чыноўніка можа азначаць толькі тое, што пасада пакуль застаецца незанятай.
Крыніца: Праваабарончы цэнтар "Вясна"